ERA sega tale ni qai waraka na veivuke ni matanitu na Tikina ko Mataso e na nodra sa vakacokotaka ga vakataki ira na nodra koro.
E vakaraitaka na nodra Mata ni Tikina vakacegu o Kasiniro Rakaweri ni oti ga na vakacaca ni cagilaba o Winston e na yabaki sa oti, era sa lomavata na lewe ni Tikina e na nodra solesolevaki, ka ra veivuketaka na kena vakasavasavataki na nodra koro ko Narikoso kei Nakorovou kei na kena veitikotiko vagalala.
E kaya o Rakaweri ni solesolevaki e ra vakayacora oqo e oka kina na tara ni veivale ka ra vakacacani, na tara ni nodra koronivuli, na kena vagalalataki na benu e loma ni koro kei na kena saula.
Kuria na Mata ni Tikina vakacegu ni dina ni yaco yani na veivuke ni matanitu, ia, me vaka ni tarai Viti raraba na vakacaca ni cagilaba, era sa mani lomavata kina me ra sa solevaka ga vakoro na nodra koro.
?E na sega tale ni dua e lako mai tuba me na mai samaka na noda koro.
?Sa dodonu me da sa tekivuna mada ga na noda Jeruisalemi,? e kaya.
Tomana o Rakaweri ni bau dua na vakacaca vinaka e vakayacora na cagilaba o Winston e na koro e rua oqo.
E kaya ni nodratou Tikina e sega ni gaunisala ni cagi, ia, na i ka 20 ni siga ni vula ko Veverueri e na yabaki sa oti, era qai vakila kina ni dua na cagi e tarai ira e na siga oya, e ra na bau guiguilecava dredre e na nodra bula taucoko.
Kuria o Rakaweri ni kalougata ga ni lako yani vakasiga na cagi e na nodratou Tikina.
?Kevaka me a lako mai e na bogi, au vakabauta ni dua na i binibini lewe ni vanua levu e na vakaleqai na nodra bula.?
?Sa kalougata ni lomani keimami tiko na noda Kalou sa cecere sara, ka keimami bula tiko mai kina me yacova na gauna oqo,? e kaya.
E na gauna e curuma kina na koro ko Narikoso na cagilaba o Winston, e a sirova mai na vei ulunivanuababa ka ra nanuma ga na lewe ni koro de sa siga ni lewa e na vakaceva ruru ni rorogo kei na kaukauwa ni cagi.
E kalougata vakalevu na Na i Lalakai ni gole yani e na siga Vakaraubuka ni macawa sa oti ni se bulabula voli ga o Kesaia Tabua ka sa yabaki 82 e na gauna oqo.
E vakasamataka lesu tale o Tabua na dredre e a sotava e na gauna vata oqo e na yabaki sa oti.
Kuria na marama oqo ni vosota toka na suasua ni nona i sulu me yacova na kida ni mataka.
Tomana na nona i talanoa o Tabua ni sa donumaki Bebe o Kina kei na vica tale na cagilaba lalai, ia, e sega ga ni dua vei ira oqori e tautauvata na nona ravuta na nodratou koro o Winston.
E kaya o Tabua ni a tiko ga e na nona vale ka sega ni taura sara vakabibi na i vakasala ni cagi.
?Na gauna ga au sa rogoca kina na tatacavucavu ni kava e na vei dela ni vale, au sa tukuna sara vei iratou na luvequ me ratou cicivaki au yani ki valenilotu,? e kaya.
Kuria o Tabua ni gauna e ratou kauti koya kina na luvena ki valenilotu e tautauvata sara ga na sara i yaloyalo, oya me ra levea tiko na sici ni dakai, e na nodra sa veisiriyaki na kava e loma ni koro.
Na vuna e rerevaki sara kina vakalevu baleta ni ratou cici tiko e na baba, ka ni nodra valenilotu e toka e na dua na delana.
?Au sa tukuna vei iratou na luvequ me ratou kakua ni kauwaitaki au, ka me ratou qara ga na nodratou bula,? e kaya.
E sega ni via rogoca na nona vakamamasu na luvena gonetagane ka ni keveti tinana tikoga me yaco sara ki valenilotu.
E na macawa sa oti e mamarau toka na marama oqo, ka ni sa oti tale oqo e yabaki dua na vakacaca ni cagilaba o Winston e na nodratou koro, ka sa raica tiko o koya na veisau levu e kauta mai kina.
Oya na kena tara na veivale vinaka, ka savasava na nodratou loma ni koro, ka kena i lutua ni ra sa tara tiko e dua na vale ni noratou i Talatala.
E vakavinavinakataka sara vakalevu o Tabua ni vakavoci tiko mai na nona bula, ka nuitaka tiko ni na donumaka talega na dolavi ni vale ni nodra i Talatala e na vula ko Evereli ni yabaki ga oqo.
Ia, e kaya ko Rakaweri ni ka kece e na rawa ga e na solesolevaki me vaka era dau cakava na noda qase e na gauna e liu.
Tomana na Mata ni Tikina vakacegu ni levu na vale ka veivuke mai kina na matanitu era sa toso tiko vakamalua, ka sa rui lailai ga na $7000 ka veiwaseyaki yani.
?O au mada ga qo sa voleka tale ni sivia na $30000 au tara ga mai e na noqu taga.?
?Vuqa vei keimami e veicalati na i yaya e kau mai, me vaka e so e kau mai na buloko kei na kau, sega na kau, so e kava kei na buloko, sega na kau? e kaya.
Kuria o Rakaweri ni veicalati tiko na vakarautaki ni yaya ki na veivale vaka oqo, ka vakavuna na nodra sa solesolevaki ga vakoro me rawa ni toso tiko na bula e na veisiga.
Sa kerekere raraba tikoga o Rakaweri ki na matanitu ke rawa ni dikevi vinaka mada na i yaya ni vale e ra kau tiko yani e na nodra veikoro me kakua ni veicalati tiko vakaoqo, ka nuitaka tiko ni na dua na veisau e na gauna e sa tu oqo e matada.
Na Tikina o Mataso e sa na tosoya tiko mada ga na nodra vakacokotaki na veivale e na koro e rua kei na vei tikotiko vagalala me rawa ni ra tiko vinaka kina na nodra kawa e na gauna mai muri.
