NA gauna ko ni la?ki volivoli kina ki tauni, lesu mai ka sobu tale vakavinaka e na nomuni dui mata ni veivale, keimami se sasaga tikoga na takosova na uciwai e na yasa ni koro ko Burelevu e na i bilbili ka sa sivia tale mai oqo e dua na yabaki.
E vakadeitaka mai ki na niusiveva oqo ko Ilisapeci Ranitu mai na koro ko Nabalasere, e na Tikina ko Nailuva na vakacaca ni cagilaba o Winston e na yabaki sa oti, sa vakacacani tiko mai kina na i kawakawa ka toka e na yasa ni koro mai Burelevu ka ra dau takosova tiko e vica na koro e na loma ni vanua oqo ko Ra.
E kaya na marama oqo ni sa dua dina na dredre levu era sotava tiko na vei korokoro ka ra tiko e na loma ni colo kei Ra.
Kuria ni so na gauna e dau tau na uca, oya era sa vakaloloma sara ga e na taumi uca ka so na gauna e dau suasua na nodra i yaya ni ra se bera mada ga ni yaco i vale.
Tomana o Ranitu ni i kawakawa ka tiko e na yasa ni koro ko Burelevu, e sova tiko ga mai kina na qereqere ka sega ni bau caka vakavinaka, ia, ni dua ga na waluvu se taubi ni uca e kuitaka sobu kece na qereqere, ka ra sa vakaleleci tiko ga e na bilibili.
Era sa kerekere vakavica e na nodra vale ni volavola ni yasana, e tukuni tiko ga mai ni na qai vakavinakataki.
E vakamacalataka na marama oqo ni sau ni keria mai Nabalasere ki Burelevu e tiko e na $40 na dola dua na tirivu, $5 na i sau ni bilibili me takoso, qai $180 na i sau ni keria mai Burelevu ki Rakiraki.
?Qo e sega ni wili kina na i sau ni neimami kako, baleta ni dua na i vesu dalo e tiko e na $1, ka $2 na i sau ni dua na taga.?
?Kevaka me keimami kauta e dua na taga yaqona bulabula e na jajitaki tale vei keimami e $5 dua,? e kaya.
Tomana o Ranitu ni sa dua na dredre levu era sotava tiko mai na loma ni vanua, ka sa oti vinaka tale oqo e dua vakacaca na yabaki e na kena tukuni tiko yani vei ira ni na qai vakavinakataki na i kawakawa oya.
E kaya ni ra sa kerea tiko vakavica e na Bose ni Tikina ke rawa mada ga ni bau vakaceretaki na nodra i kawakawa, baleta ni cere ruarua tiko na tai ni uciwai, ka ra na sega ni kauwaitaka kevaka e tubu mai kevaka e sa cere na nodra i kawakawa.
Sa nuitaka tiko o Ranitu ni rawa ni bau kauwai na noda Paraiminisita ka i liuliu ni noda matanitu kei iratou na Tabana ni Gaunisala e na noda vanua na nodra gagadre na wekada era tiko e na loma ni colo kei Ra.
Na veikoro e ra tiko e na tai ni uciwai kadua e okati kina na koro ko Namara, Nasavu, Nailuva, Nauria, Nasau, Nasukamai kei na so na i tikotiko vagalala, ka rauta tiko e rua na udolu vakacaca na kedra i wiliwili.
