NI bula vinaka na turaga, marama, cauravou, goneyalewa kei kemuni ragone.
Ena Moniti na ika 27 ni Maji, 2017, a mai vakayacori e valenivolavola na isevu ni bose ni Komiti ni Vosa Vakaviti. Era lewena na komiti na Tabacakacaka ni Vuli (Tabana ni iTovo kei na Vakavovotu kei na Tabana ni Navunavuci), Soqosoqo ni Qasenivuli Vakacegu, Soqosoqo ni iVolatabu (Bible Society), Yunivesiti ni Ceva ni Pasivika, Matabose ni iLavo Maroroi ni iTaukei kei na Soqosoqo ni Veimatalotu e Viti. Era a tiko taucoko na mata ka vakavo ga na mata mai na Soqosoqo ni Veimatalotu e Viti.
E usutu ni komiti me railesuva ka vakacuruma na vosa vovou ena iVolavosa Vakaviti (iTaukei Dictionary). Na iVolavosa Vakaviti era a sevutaka na turaga Peresitedi Vakacegu o Ratu Josefa Iloilovatu ena 2008 ka sa vakadonuya tale ga na matanitu me taurivaki.
Na itavi ni komiti me;
(i) vakadonuya na vosa me tabaki ena iVolavosa Vakaviti,
(ii) vakatetea na vakayagataki ni iVolavosa Vakaviti ena veitabana,
(iii) vakatulewataka na vosa vovou me vakacurumi ena iVolavosa Vakaviti,
(iv) dikeva ka editataka na vosa mera tabaki ena iVolavosa Vakaviti,
(v) vakatututaka na vosa me vakacurumi ena iVolavosa Vakaviti ka raica me vakadonuya taumada na Matabose ni Veika Vakaitaukei ni bera ni tabaki ena iVolavosa,
(vi) vakatututaka na ivakarau ni kena vakatetei na iVolavosa ena veitagede ni veiqaravi ka me vakacurumi ena ituvatuva era sa tu rawa,
(vii) vakatututaka na veisau ena Tabana ni Vosa me yavutaki vakalawa na nona veiqaravi,
(viii) raica na tauyavutaki ni Matabose ni Vosa Vakaviti (iTaukei Language Commission) me vakatulewataka na vosa vakaviti.
(ix) taracake na itagede ni Matabose ni Vosa Vakaviti me veiraurau kei na veimatabose ni vosa e vuravura.
Ena vica na yavu ni veiqaravi qori, sa vakavinavinakataka na Tabacakacaka iTaukei na nodra solia na nodra gauna na mata mai na veisoqosoqo, koronivuli kei na matalotu me veitalanoataki na noda iyau vakamareqeti na kawa itaukei oya na vosa.
Sa dodonu tale ga meda ciqoma ni dua na tiki bibi ni kena taraicake na vosa oya me qaravi na vakadidike vosa.
Ena loma ni vakadidike ena gadrevi me buli eso na vosa vovou se vosa kerei me rawa ni tete na yalava ni vosa vakaviti ka tagava na veika vovou sa curuma mai na noda Viti.
Kevaka e tiko na nomuni vakatataro me baleta na vosa, e rawa ni oni volavola mai ina Tabana ni Vosa kei na iTovo Vakaviti, katonimeli 2100, Valenitabacakacaka e Suva se ni qiri vua na Daereketa ena 3100 909 (1036).
Sa vakamamasu ni Tabacakacaka iTaukei me maroroi ka vosataki tiko na noda vosa ka bulataki na kena itovo, ni oqori ga na veika eda kilai tani kina e vuravura taucoko.
