O KEMUNI na noqu vuvale, na taciqu ka ganequ talega ena gauna au raica kina na loa ni matamuni ena nomuni raici au tiko mai qo. Oya na veika e cauraka tiko o Yaron Sultan Dadon na daunivakasala ni matanitu o Isireli ki na Pasivika ena nona vosa tiko ena siga Vakaraubuka sa oti ni oti na tayabe e Suva ni kena vakananumi na yabaki 70 ni nona tu vakaikoya na matanitu o Isireli.
Fiji is not the lost tribe but the founded tribe who found Israel and the two countries found each other.
O Viti e sega ni ‘yavusa ka sa yali tu’ ni Isireli, ia ko ni sa mai kune, ni a kunei Isireli, rau qai mai veikune na matanitu e rua.
A marautaka o Dadon na veitokoni era a vakaitavi kina na lewe ni Lotu Vakarisito ka ra bau tayabe mai na Flea Market ki na Ratu Sukuna Park ena Siga Valaraubuka sa oti.
E na nona vosa tiko ena Sukuna Park ko Dadon e kaya ni o koya e kawa mai na Yavusa i Juta mai na yavusa e 12 na luvei Jekope ka ra basika kina na yavusa Isireli ka talanoataki tiko e na i Vola Tabu.
E vakavinavinakataka talega o koya na i sema bula ni veiwekani makawa e rau kilai kina o Isireli kei na noda vanua o Viti. E kaya ni veika sa oti e na gauna e liu, ena tomana tikoga o Isireli na nona tu ravita na noda vanua, me vaka e dau vakayacora tu e na gauna e liu ka na tomana tikoga na nona veivuke ena tabana ni bula, na vuli, teitei kei na susu manumanu, na veisaututaki kei na veitabana tale eso e gadrevi kina na veivuke ni matanitu qaqa oqo.
E kuria o Dadon ni dina ni levu na kena meca o Isireli ka dua na gauna ni bolebole levu vei Isireli e sa tu e matana me vaka ni sotava na dredre ena so na i soqosoqo, kei na veimatanitu ena veiyasai vuravura, ia, e kaya ni tu raviti Viti o Isireli me vaka ga na nona tu raviti Isireli o Viti.
E tukuna o Dadon ni mala ni vosa kece e tukuna tiko oya e a vakadewataka mai vua na nona matanitu ka talai koya mai me nona i tukutuku vei keda na lewei Viti. Vakaraitaka talega ni matata vinaka tu mai vei ira na i sema ni noda veiwekani.
E tukuna o Lepani Makubuna na iliuliu ni soqosoqo na Christians of Israel e Viti ni soqosoqo qo e roboti vuravura taucoko.
E kaya o Makubuna ni soqosoqo qo e ra dau vakabauta ka tu vata kei Isireli, ka kaya ni mata ni vika vinaka na 70 ka vakaraitaka na savasava kei na taucoko ena kena vakananumi ena yabaki qo na yabaki 70 ni tu vakaikoya ni matanitu o Isireli.
