Na mate ni suka e dua na mate esa veivakamatei tiko vei keda na lewei Viti.
E dodonu me da na taura vakabibi na i tukutuku oqo me vaka e tabaki tiko ena tabana e 3 ni neitou niusiveva oqo.
E levu sara na veika e cauraki tiko mai me baleta na mate oqo kei na veika me da na qaqarauni kina.
E da sa vakasalataki ena vuku ni keda kakana.
Esa ka bibi na noda raica me da kania na kakana bulabula ki na yagoda.
E daumaka talega me da tea na kakana draudrau, ena noda yasa ni vale.
Na kakana draudrau me vaka na bele, na ota, na karamua, na tubua kei na vuqa tale.
Eda kalougata e Viti ni levu tu na keda vuata.
Na vuata me vaka na moli, na tarawau, maqo, dawa, quwawa kei na vuqa tale.
Kevaka era sa tukuna mai na tabana ni bula ni veiyatolu na lewenivanua e dua e na tauvimate ni suka, ia e dodonu me da na qaqarauni kina.
E tukuni talega ena noda i talanoa ni $400 na milioni na levu ni lavo e vakayagataka tu na matanitu ena kena wali tiko na leqa oqo kei na i lavo e vakayagataki ena Tabana ni Bula.
E dodonu talega me na vaqaqacotaka na matanitu na kena vakarautaki na i sau ni kakana bulabula ena dua na i sau e da rawata ni volia na lewenivanua taucoko.
E laurai ni levu na kakana bulabula e sa dau toka saraga e cake na kena i sau ka levu na veivuvale e Viti era sa volia ga na kakana e sega soti ni yaga ki na yagoda ena gauna era la’ki volivoli kina.
Esa veitataunaki na Nai Lalakai ena noda raica vakayalomatua na veika era sa cauraka tiko mai na Tabana ni Bula ka me da na cakava kina e dua na ka.
Me da vakatulewataka vakavinaka na noda bula, ena vinaka kina o keda kei ira na noda lewenivuvale.
Ena mua ni macawa qo, eda sa na nanamaki yani ki na sotasota ni qito le yavitu mai Lodoni.
E na daumaka me da na veitokoni tale vei iratou na timi ni Viti.
Oqo e sa i otioti ni gauna me ratou na tovolea me ratou na rawata kina na i ulu ni covi ni qito le yavitu ka ratou mai qaqa kina na timi ni Sauca Aferika ena yabaki sa oti.
Esa tu na vakanuinui ni ratou na qito sara vakavinaka na nodatou matatimi ena mua ni macawa oqo.
E dua talega na i tukutuku rogorogo vinaka ni sa mai sainitaka e dua na nona konitaraki ni qito rakavi e Varanise na noda toa ni vala o Eroni Sau.
Na noda dauqito oqo e vakasakiti sara tiko na nona qito ena gauna e cadra cake kina ena sotasota ni HSBC World Rugby Sevens Series ka laurai ni matua ka kaukauwa na nona qito.
Sa rauta me ra vinakati koya kina na kalavo ni rakavi mai valagi ena taledi sa toka vua na cauravou oqo. E da qoroqoro talega ena vakasakiti ni qito e vakayacora tiko o Semi Radradra ena timi ni Barbarians ena gauna e sota kina kei na timi ni Igiladi.
Eda sa vakanuinui tu ni ko iratou na noda toa ni vala e gadreva tiko o Gareth Baber ni ratou na mai vakaitavi ena sotasota ni World Cup ena vula o Jiulai.
