SA OTI vakavinaka oqo e rua na vula na kena sega ni lako tiko mai na basi e na neimami i tikotiko.
E vakadeitaka mai ko Vilikisa Nagalu, na jeameni ni koro ko Burelevu, e na yasana o Ra ni dua na dredre levu era sa sotava tiko na lewe ni nodratou tikina e na gauna oqo.
E kaya ko Nagalu ni ra sa cumuwaqara ga na lewe ni koro na vaqara na lori me ra vodo kina, ka ni sa sega ni qai lako tiko yani na basi na Flying Princess, ka dau qarava tiko na nodratou tikina.
“E liu e dau mai moce tiko e na neitou koro na basi, qai dau lako e na mataka lailai. Keimami sega sara ga ni kila se cava e sa leqa, ka ratou sega ni bau tukuna mai na i taukei ni basi, se cava na vuni leqa.
“Na gauna oqo era sa wini ga na i taukei ni keria, e na nodra dau jajitaki kevaka me keimami gole ki tauni,” kaya o Nagalu.
Tomana o Nagalu ni gauna oqo e se caka tu ga vakavo na nodratou i kawakawa, ka sega sara ni caka vakavinaka.
Sa kerekere vakabibi sara tikoga ko Nagalu ki vei iratou nai taukei ni basi, ka vakakina na Minisita ni Veilakoyaki e na vanua mamaca, ke rawa ni bau irovi na nodratou kerekere, me rawa ni ra marautaka kina na lewe ni vanua, na nodra lako ki na tauni mai na yasayasa vaka-Ra.
“Au sa kerekere talega ki na matanitu, ke rawa ni bau veivuke mai e na neimami leqa na wekamuni e na colo kei Ra,” kaya o Nagalu.
