E A vakamacalataka tiko e Palimedi na Minisita ni Teitei, o Inia Seruiratu e vica na yavu ni nodratou veiqaravi ena kena sa mai sainitaki oti e dua na i tuvatuva ka vakatokai na Resilience Project Agreement kei na tabana ni Matabose kei Vuravura na Food and Agricultural Organisation (FAO).
Vakaraitaka ni soli tiko ki na matanitu e na loma ni tolu na yabaki oqo mai na 2018 ki na 2020 me na vukei kina o ira na dauteitei kei ira era vakaitavi ena tabana ni teitei ena noda vanua.
E kilai deivaki talega ni o Viti e dua vei ira na 15 na matanitu ena wase ni vuravura oqo e dau yaco kina vakawasoma na leqa tubu koso me vaka na cagilaba, na ualuvu kei na so tale na leqa tubu koso.
E i naki ni tuvatuva oqo me na vaqaqacotaki na kena teivaki vakalevu na kakana e Viti ka me kua ni da vakararavi vakalevu ki na veivanua tani me baleta na keda kakana.
E rauta ni $3. 1 na milioni na levu ni lavo me na vakayagataki ena loma ni tolu na yabaki oqo.
E kaya talega ena loma ni Palimedi o Seruiratu ni sa tikoga na i vakarau ni nodratou veiqaravi na tabana ni FAO ka sa tiko na nodratou valenivolavola e Viti ka rau cakacaka vata kei na European Union.
E vakaraitaka talega o Seruiratu ni dodonu ka ra sa vakavulici tale tikoga na dauteitei ena kakana mera tea me tiko kina na veika bulabula e gadreva na yagoda ka meda bulabula kina vata kei na i wiliwili ni kakana me tei ka volitaki me veiraurau kei na gagadre ni lewenivanua ena noda vanua.
E vakaraitaka o Seruiratu ni veika me baleta na valuti ni draki veisau, e sa vakavulici tiko o ira na dauteitei kei na susu manumanu ena nodra kila na i walewale ni teitei kei na susu manumanu ka rawa ni vorati ka vakalailaitaki kina na vakacaca e rawa ni yaco ena nodra i teitei.