VUQA na gauna era dau sala ose se taubale sara ga na lewe ni Tabacakacaka ko Navakasiga ni dau vakayacori na Lotu Vulavou e na neitou Tabacakacaka.
E vakadeitaka mai na i tukutuku oqori ki na Na i Lalakai o Talatala Ponipate Tuvata Na i Talatala ni Tabacakacaka ko Navakasiga e na vula sa dromu.
E kaya o Tuvata ni se qai la’ki 4 wale tikoga na vula e na Tabacakacaka ko Navakasiga ni oti mai na nona a veiqaravi mai na Tabacakacaka ko Namuka-i-Lau, ka sa kena i ka 13 ni Talatala me veiqaravi e na Tabacakacaka ko Navakasiga.
Tomana ni dua na leqa levu ga e raica, sa i koya na dredre ni veilakoyaki, ka ni sega na lori me veiusa e na veikoro, ka dau vakayacori kina na Lotu ni Vulavou. Kuria ni ratou sa rui veiyawaki na koro e na Tikina ko Navakasiga, ka sa rauta ga na vodo ose se taubale e na gauna ni Lotu Vulavou.
“Sa dua na ka na noqu dau qoroi ira na i vavakoso e na neitou Tabacakacaka, e na nodra sega ni dau vakacauoca ena tutaka na lotu kei na nodra saga me ra dau tiko e na Lotu Vulavou, ka veitalia na gaunisala cava era dui lakova yani.
“Ni dau vakayacori na lotu mai na koro ko Naivaka, se ko Koroinasolo, e so vei ira na i vavakoso era na dau taubaletaka sara ga.
“Au raica eke na nodra dinata na lotu na Tabacakacaka oqo, ka’u vakavinavinakataki ira sara vakalevu ni ra vakaduria tikoga na kauveilatai ni Gone Turaga ko Jisu Karisito ena veigauna kece,” kaya o Tuvata.
Tomana ni sa lewena tiko na i soqosoqo ni veivakatorocaketaki e na Tabacakacaka ko Navakasiga, ka nuitaka tiko ni na dua na siga, era na lomavata na lewe ni Tabacakacaka me na voli e dua na tolili, me rawa ni vakarawarawataka na gaunisala ni nodra veidewayaki.
