Update: 8:46AM Three Angels
AU gadreva meu wasea vei keda e dua nai talanoa me baleta e dua nai tikotiko ni veiqaravi ka sa veivakabulai tiko e daidai. Na yaca ni valenibula oqo na Three Angels Health Retreat ka tiko mai Nacilau e na Tikina ko Rakiraki e na yasana o Ra.
E veiqaravi tiko e na valenibula oqo ko Dr Ratu Epeli Nailatikau vata kei na Seventh Day Adventist Church.
Na veiqaravi ka vakayacori tiko ena valenibula oqo e vakayagataki vakatabakidua tiko kina na Herbal Treatment ka vakayagataki ga kina na vuanikau, draunikau, vata kei na veimataqali waiwai me vaka na virgin oil, kei na castor oil.
E sega sara ga ni vakayagataki se vakatarai ena Three Angels Health Retreat na veimataqali wainimate ka dau vakayagataki ena valenibula.
Era sa vakabulai oti e na vanua ni veiqaravi oqo ko ira ka tauvi ira na tubu ni dra, mate ni suka, gout, kenisa ni sucu kei na vuqa tale na veimataqali mate sureti se lifestyle diseases.
E tiko tale ga e na vanua ni veiqaravi oqo e dua na mataqali veiqaravi ka vakatokai na cleansing ka me vakasavasavataki ki na na gacagaca ni tamata ka rawa talega ni soli vei ira ka ra bula vinaka sara tu ga.
Ko ira kece sara ka ra sa qaravi oti mai kea e ra okati kina na noda e Viti ka vaka kina ko ira na vulagi ka ra gole mai vanua tani.
Era marautaka kece nai valavala ni veiqaravi era sotava ka ra vakila tale ga na veisau levu ena nodra bula ka vuqa sara esa veisau sara ga kina nai vakarau ni nodra kana ka vaka kina na nodra maroroya na nodra bula ena vakaukauwa yago.
Ena vuku ni bula osooso ni qaravi tavi ka tarai kemuni tu na noda ka ko ni vakai tutu lelevu e na matanitu ka vaka kina ena veikabani kei na veitabana tale eso, ka sa dredre tu kina mo ni kunea na vakacegu, e na uasivi sara mo ni laki qaravi e na valenibula oqo.
Ko ni rawa ni laki qaravi e na loma ni 4 na siga ka koto na kena i sau vakailavo e na $300 na dola kina $400 na dola.
Ni da vakasamataka na bibi ni noda bula ka vaka kina na noda i tavi kina noda matavuvale, vanua ni cakacaka ka vaka kina ena bula ni matanitu ko Viti ka da qai veidutaitaka vata kei na i sau ni noda laki qaravi e na vanua ni veiqaravi oqo eda rawa ni kaya ni sa dua na veivakalougatataki levu e koto mai na Nacilau Three Angels Health Retreat.
Esa na qai vakatau vei kemuni na nomuni ciqoma na veivuke oqo.
Vinaka Vakalevu
ALIPATE D. TUIDRAKI
Nakavu,
Nadi.
Marau o Viti
E KURUSETI Viti tu e daidai na marau kei na reki (14/09/14) e na nodra sa vagalalataki mai na liga ni meca na noda sotia lewe 45 ka ra tauri vakavesu tu ena ligadra nai lala dau vakacaca, na al-Nusra mai Syria ena macawa sa oti.
Sa dodonu me vakavinavinakataki na noda Kalou e na vuku ni veisereki veivakurabuitaki levu oqo. E i vakaraitaki ni nona loloma kei na nona kaukauwa, kei na nona lewa, sa dodonu meda vakararavi tikoga vua.
E veivakadeitaki na nona vosa ena (Same 33:16) E kaya ni sa sega e dua na Tui sa bula e na vuku ni Mataivalu Levu., ka sega na qaqa me vakabulai ena nona kaukauwa levu, (tikina e 12) Sa kalougata na Matanitu sa nodra Kalou ko Jiova; kei na Mataqali sa digitaka ko koya me nona i votavota (tikina e 18) Raica na matai Jiova sa wanonovi ira era sa nuitaka na nona loloma.
E lewe vica e bau vakanananu, ena veivakabulai levu vaka oqo? Au vakabauta ni sega ni o ira duadua ga na wekadra vakavoleka era reki ena vuku ni veivakabulai oqo.
O keda keca na lewe i Viti era oka kina na duidui vakabauta vakamatalotu eda sa okati vata tu oqo e na yaca na Fijian. Au vakavinavinaka kece vei ira na vei matalotu era duavata ka lomavata e na veimasulaki me sereki na Kalou.
Ia, ni sa rogoci na noda masumasu kei na vakatakekere, a cava tale sa vo? Me da veilomani! Me kua ni o veisausaumitaka na nona ca e dua ka nakita e liu na veika e dodonu e na matadra na tamata kecega.
Me vaka ni da tamata lomani taucoko, me da kua ni sauma na ca e caka vei keda. Me da laiva ga vua na Kalou me sauma. Kemuni na dau wili Nai Lalakai, e na vuku ni noma veivakabulai na Turaga vei ira na noda cauravou lewe 45, eda sa vakadinadinataka ni sa rogoca na noda masu na Kalou, oya na yaga ni noda lomavata e na gauna ni leqa.
Me da vakanamata vei ira era sa liutaki keda ena veidigidigi levu ena i ka 17 ni siga ni vula o Seviteba se o cei ga na Pati, me da tokona ka yalovata, ka da kerea vua na Kalou me vukei keda kina me vakaga na nodra sa sereki na noda sotia mai na lighadra na meca.
Me da kalougata tiko ena vo ni veisiga sa tiko e matada.
Vinaka vakalevu
JOVILISI KEDRAYATE
Naimasimasi,
Vugalei
Tailevu
Kai Votua Dina
NA nodra Vu na Kai Votua Dina se Yavusa Votua e yacana ko Davu. E tukuni ni rau veidiriki e 2 na vatu ka sucu ko Davu.
E kena i balebale oqo ni rau a veidauci e 2 na veiganeni ka rau Kai Vatu ruarua ka mani sucu kina ko Davu. E a qai vakawati ko Davu ka watina ko Lewakutawai.
E rau a lewe 2 na luvedrau koya ko Nalauvatu ka ra a basika kina na Yavusa Votua ka gone ko Nasiganibua ka ra basika kina na Yavusa Nadua.
Na yavutu nei Davu mai Nakauvadra ko Votua. E a biuti Nakauvadra ko Davu ka lako mai ki Ba ka mai nona yavutu e keya ko Nadrabasaga.
Na nodra kau na kawa nei Davu na vesi, nodra manumanu na kitou ka nodra ika na busa vei ira na tagane, ia, vei ira na yalewa vakoli –
Na kedra kakana na vurai ka nodra i vakacaucau ni ravu na Votua Ni Siga!
Ni da muria na kawa nei Nalauvatu e matata koto ni a luvena ko Vudrega. E a qai wati vudrega ko Rakavosa na marama ni Tavua, ka ra lewe 5 na luvedrau ka ra a basika kina na 5 na Mataqali ena Yavusa Votua ka a kilai taumada.
E qase duadua ko Nakaroti Raciva ka dau kacivi talega e na yaca Ratu, Ratuvakalevu se Ratulekeleke ka ra a basika kina na Mataqali Wavuwavu e na yavusa Votua.
E tarava ko Nakama se ko Sigavou ka ra basika kina na Mataqali Natara ena Yavusa Votua. E tarava ko Madra ka ra a basika kina na Mataqali Korovou e na Yavusa Votua.
E tarava ko Galunaka ka ra a basika kina na mataqali Bau ena Yavusa Votua. E kena i ka lima ko Laqaya ka ra a basika kina na Mataqali Nairai e na Yavusa Votua.
Ke da muria ga na kawa ni ulumatua mai vei Nakaroti Raciva e ratou a lewe 5 na luvena mai na Mataqali Wavuwavu koya ko Kabalo, Reba, Banuve, Caguru kei Neiyakayaka.
Ia, na kawa ni qase ka luvei Kabalo ko Menemene. Na luvei Menemene ko Joeli Nanituguruguru ko ya ko Josaia Sadrugu ka a lako ki Yaqeta mai Yasawa vata kei Apakuki Tuivunilagi ka a tiko voli ga mai Votua mai Ba ka donuya na i matai ni Veitarogi Vanua.
Na wati Josaia Sadrugu ka a lako ki Yaqeta mai Yasawa ko Nalikura na marama ni Tavua.
E rau a lewe 2 na luvedrau yalewa ko ya ko Vani Neiene ka a vakawati ki na i Tokatoka Nanuku No. 260 e na Mataqali Nadua e na Yavusa Nadua mai Yaqeta vata kei Kinisimere Neisua ka a vakawati vei iratou na i Tokatoka Vunisea No. 261 e na Mataqali Nadua, Yavusa Nadua mai Yaqeta mai Yasawa.
Ia, ni sa mai mate na tinadrau ko Nalikura na marama ni Tavua, e a qai vakawati tale ko Josaia Sadrugu ka tauri Emele Drau mai nai Tokatoka Nanuku No.260 e na Mataqali Nadua mai Yaqeta ka luvedrau ko Tevita Ratu.
E rau a qai lewe 2 na luvei Tevita Ratu ko ya ko Josaia Neisua kei Arimi Raciva. E ratou a lewe 5 na kawa ni qase mai vei Josaia Neisua ko ya ko Tevita Ratulekeleke, Adi Balavu Vudrega, Joeli Sadrugu, Mere Navuga kei Arini Raciva.
E ratou a qai lewe 7 na luvei Tevita Ratulekeleke ka kawa ni ulumatua ko ya ko Naomi Neisua, Josaia Neisua, Jiuta Delaibatiki, Anaselia Rokoca, Apisai Neilovo, Sigalele Bari kei Eneri Vuranovo.
E kena i balebale oqo ni kawa ulumatua duadua vei ira keca na kawa ni Yavusa Votua ka ra i taukei dina ni vanua ko Ba, ko Josaia Neisua ka vakaitikotiko voli mai Navutu e Lautoka e na gauna e daidai.
E sa sasagataka vakaukauwa sara tiko ko koya me sa tokitaki lesu ki Votua mai Ba ka ni sai koya ko ya na nona vanua dina ka tu mai kina na nona OWNERSHIP RIGHTS ki na qele kei na i qoliqoli.
E a sa kerea oti vei Ratu Viliame Tagivetaua na nona tokitaki me vaka e virikotori tu ena lawa ka qai rere me vakayacora na nona i tavi vaka I Liuliu Ni Veitarogi Vanua me veitokitaki.
E baci kerea tale vei Ratu Isireli Vanalagilagi Vesikula me sa tokitaki ka qai vakaraitaka mai ni sa sega na qele mai Ba me ratou tokitaki kina.
E kena i balebale oqo ni sa vakaliuci tiko na nodra USAGE RIGHTS se DODONU NI VAKAYAGATAKA ko ira na veiyavusa vulagi ka ra sa tawa vanua tu e daidai mai Ba ka sa sega sara tu ga ni bau kauwaitaki na kena vakasukai na kedra qele na Yavusa Votua vei ira na kena i taukei dina, ka ra sasaga tiko oqo na nodra tokitaki me vaka e virikotori tu vakalawa ena Section 10 (2) Native Lands Act.
Ia, ni da rai ki na kawa nei Nasiganibua ka gone vei Nalauvatu e da a raica ni luvei Nasiganibua ko Soakula ka watina ko Ranadi na marama ni Rakiraki ka ratou lewe 4 na luvena, ko ya ko Betelevu, Salobo, Nabulakai kei Nagonevulavula.
E rau lewe 2 na luvei Betelevu mai liu ko ya ko Koro ka tinana na yalewa ni Naibulukau vata kei Naulusovusovu.
E a qai vakawati tale ko Betelevu vei Lewagalu na ganei Dudulevu mai na Yavusa Somosomo mai Naviti mai Yasawa.
Na kawa nei Salabo na i Tokatoka Nadonumai mai Yaqeta. Na kawa nei Nabulakai na i Tokatoka Talenatui mai Yaqeta. Na kawa nei Nagonevulavula na i Tokatoka Namone mai Yaqeta.
Na kawa nei Betelevu vei Lewagalu ko Kava, Vueti kei Cagibula ka ra tiko na kena kawa e na i Tokatoka Vunisea, Mataqali Nadua, Yavusa Nadua mai Yaqeta.
Na kawa nei Koro na Luvei Betelevu na i Tokatoka Nocoko mai Yaqeta. Ko Dudulevu e a qai solia vei tavalena ko Betelevu na yanuyanu ko Yaqeta me laki tawana.
Era sa tu kina e daidai na lewe ni Yavusa Nadua vata kei ira na lewe ni Yavusa Votua ka ra sa VOLA RAVI tu e na Yavusa Nadua mai Yaqeta e daidai. Na nodra OWNERSHIP RIGHTS ki na qele na Yavusa Votua e koto ga mai Ba ka koto walega vei ira na USAGE RIGHTS mai Yaqeta mai Yasawa baleta na yanuyanu ko Yaqeta e nodratou na Yavusa Somosomo ka asoli walega vei Betelevu me vakayagataka.
Ia, na matanitu esa surevaka tiko vei ratou na Yavusa Votua me ratou sa ciqoma tu madaga na nodratou USAGE RIGHTS mai Yaqeta ka me ratou sa kakua ni saga na nodratou OWNERSHIP RIGHTS mai Ba. Oqo e dua na cala levu ka dodonu me vakadodonutaki na kena vakasama mai na matanitu nei Bainimarama, ia, e ka ni rarawa ni sa toqa tu ena COSTITUTION ko Bainimarama me sa na dei tuga na lawa ni qele ka kena i balebale me ra sa na tu ga vakavulagi na Yavusa Votua e na vanua era sa tu kina e daidai ka vaka kina ko ira na 460 na Mataqali ka ra VOLA RAVI tale tuga e na veiyavusa ena Yasana ko Ra e daidai.
Ni kaya tiko ko Bainimarama ni qaqaco tu na lawa ni qele ni kawa i Taukei e sa dua na lasu vakaitamera mai vua e dua ka sega sara tu ga ni kila na ka e cavuta tiko baleta ni lecaika tu e na veika vakalawa.
E qaqaco vakacava tu na lawa ni qele ni sega tu ni rokovi na nodra OWNERSHIP RIGHTS na i taukei dina ni qele ka sa laki vakadewataki cala tiko na USAGE RIGHTS ka ra a solia na i taukei dina ni qele vei ira era VOLA RAVI me sa OWNERSHIP RIGHTS me vaka e yaco tu vei iratou e 460 na Mataqali ena Yasana ko Ra ka sega ni wili kina na vo ni veiyasana e Viti.
Kevaka e na wili kece na levu ni Mataqali ka ra VOLA RAVI tu ena Yasana ko Lomaiviti, e na rauta beka e 255 ka kena i balebale ni na rauta tiko beka e 3 na udolu vakacaca na lewe ni Mataqali ka ra VOLA RAVI tu e na veivanua ka ra volai tu kina e daidai ka koto walega vei ira na USAGE RIGHTS baleta ni matata tu mai na valenivolavola ni Veitarogi Vanua se ko cei na i taukei dina ni qele koya.
E matata tu e na ARTICLE 8 (2) ni United Nations Declaration On The Rights Of Indigenous ni tekivu na VOLA RAVI se me da laki kocova na kena qele e dua na yavusa tani.
Niu rogoca na i vakamacala nei Bainimarama, Ro Teimumu, Dr, Biman Prasad vata kei Mr. Felix Anthony me baleta na United nations Declaration On The Rights Of Indigenous People, e uasivi duadua na i vakamacala nei Mr. Felix Anthony ka matata talega na nona i tuvatuva, ka turaga vuku duadua vei ira na i liuliu ni i soqosoqo vaka politiki kece ka ra sa vakatarogi oti.
Vinaka vakalevu.
ALIPATE. D. TUIDRAKI
Nakavu,
Nadi
Veivakurabuitaki
ESA mai oti na cici cere. Esa rawata na FijiFirst na i wiliwili e a tatadra voli mai kina.
E dina ni a veiletitaki, ka ra nanuma e vuqa ni caka vakalawaki na veidigidigi, ka sega ni rawa ni laki rawati tu na i wiliwili levu e sa toqai vei Bainimarama.
Se dina! Se sega! e sa tauca o Bainimarama na i yau ni cere. Sa dodonu me da vakavinavinaka vei ira kece sara na noda era solia na nodra gauna kei na nodra i yau, ena nodra sasaga e na cici cere oqo.
Au qoroi kemuni kau doka na nomuni yalodina e na nomuni sa vakaitavi rawa e na sagai ni dabedabe e na loma ni Vale ni Bose Lawa.
Me kua ni da nanuma ni ra druka, au okati ira me ra turaga ka marama qaqa, o keda ga na veidigitaki me da tarogi keda se sa dodonu tiko beka na i toqa au digitaka? Ena gauna ni nona veiliutaki na Tui o Tevita, e kaya na i Vola Tabu ni nona gagadre me cakacaka vakavuku, ka vakadodonu vua na Kalou ena vukudra na lewe ni vanua. Ena sega ni totaka na ka e veve. Rogoca na ka e kaya na (Same 101:6) – Au na raici ira na tamata sa yalodina ena vanua me ra tiko vata kei au: O koya sa muria na i valavala dodonu, e na veiqaravi vei au, (Tikina e 7) O koya sa cakacaka vaka veivakaisini, ena sega ni tiko e na loma ni noqu veiliutaki, kei koya sa vosa lasu e na sega ni tiko dei e mataqu.
E vakabibitaka eke na Tui o Tevita na ka me baleta na vanua, kei ira na lewena, ena vuku ni nodra qaravi.
Au sa nuitaka ni na sega ni guilecavi keda na lewe ni vanua na FijiFirst, ena i wiliwili levu duadua era digitaki Bainimarama, o koya era sa via veiletitaka tiko, e vuqa vei keda e daidai. Se cava eda na via vakalewa, sa qima na ka kece, me da veitauriliga ka sala vata ena veilomani.
E dua bulu tiko ga na noqu i tatau, mo ni tomana cake tikoga na nomuni veiqaravi vei keimami na lewe ni vanua oqo na vu ni neimami digitaka kina na nomuni Pati na FijiFirst, me cici tale e na loma ni 4 na yabaki ka tu mai.
Mo ni kalougata tiko ka bula balavu vat kei ira kece sara na liga ni nomuni dau veiqaravi e na matanitu.
Vinaka vakalevu
JOVILISI KEDRAYATE
Naimasimasi, Vugalei,
Tailevu
Dau veivakacalai
ENA vica vata na vula sa oti e ratou veitokoni voli kina na wekada ko Viliame Nabiau, Ro Qiqi Tuicolo vata kei na Registered Consultant ka vakaivola e na vakadidike ko Taitusi Rasoki e na noqu beitaki niu dau veivakacalai baleta niu a vakaraitaka tiko na veika e baleta na qele ka dabe koto kina na Lautoka City. Ia, ni sa laki vakayacori na kena veivaqaqai sa qai suka lesu tale na i dusidusi ni turaga ka sa qai dusia dina se ko cei na dau ni veivakacalai.
E sa ka dredre dina me da dau tiloma lesu tale na vosa ni vei vakacacani eda dau tauca ka vakakina na noda dau via vakalevulevui keda ena i tavi eda qarava tiko baleta ni na dau laki tavaki keda tale mai liu na veika e da cavuta.
E se galu tu na i taukei dina ni qele oqo ka se waraka galugalu tiko na siga me na qai vakasukai kina vua na nona Ownership Rights se Dodonu Ni Taukena. Ena leka ga mai na i qila ka maca mai na benisini ni vosa, ia na qele oqo e kila deiavaki tu na kena i taukei.
Ke tiko vei keda na Title ni qele se da sa mani taura tiko na kena i lavo ni lisi, ia, me da nanuma tiko ni koto walega e ligada na Usage Rights se dodonu ni vakayagataka.
Me kakua sara ni da laki tovolea me da via laki lagata mai eso na qaqa ni sere vou ka me da laki kaya kina ni noda na qele ko ya.
Na nodra Ownership Rights se dodonu ni Taukena ko ira na i taukei dina ni qele ena tu ga vei ira me yacova sara ni ra sa kawboko.
E sega na betena meda via laki vakacereuvuuvutaki keda ni da Registered Consultant se kenadau e na noda cakacaka baleta ni oqo nai vakaraitaki ni tamata dokadoka ka da sa kila tale tuga ni dau basika ga na dokadoka ni sa voleka ni da beci.
E ka talei me da vakusakusa tiko ga vakamalua ka da veiraiyaki tiko de da qai tacaqe se da butuka tale eso na i vako. E sega talega ni ka vinaka me da dau kalawaca na uludra eso na wekadra ka ra tagi galugalu tiko ni ra dina tiko ka sega ni dua e bau vukei ira.
Me da vakavulici keda me da dau vakamatautaka na bula ni tamata kocokoco baleta na i vakarau ni bula oqo e vulagi ki na noda bula na kawa i Taukei ka ni da tamata yalovinaka, mamarau, dauloloma, dauveikauwaitaki ka dau veivakaliuci.
Me da ciqoma ga na ka e noda ka me qai vakatau ga vei keda na noda vakayagataka.
Au nuitaka ni sa levu na lesoni e vulici rawa mai na veivolavolai ka baleta na Vitogo/Drasa Crown Grant ka ni dodonu me rau na qai Claim ga kina na kawa nei Erovu vata kei na kawa nei Vuda kei na kawa ne Vu.
Vinaka vakalevui
ALIPATE. D. TUIDRAKI
Nakavu, Nadi
Toso tiko o Kubuna
AU KEREA saka mo ni bau tabaka saka ena noda veva Nai Lalakai na i tukutuku oqo:
lSa kerei kemuni saka na Gone Turaga kei na Gone Marama me da digitaki Bainimarama kei ratou na nona i lawalawa me ra noda Mata ki na Boselawa.
lMe bula ko Viti me da bula cecere ni veivakatorocaketaki kei na sautu e na noda vanua
lKakua ni kauti ira mai na mata makawa. E na qai kau cake. Era na mai vakaseva walega na veivakatorocaketaki kei na navunavuci e sa tu rawa.
E levu na ka era vakatomika mai me mai nodra i le ni politiki, sa mai tawa na taga ka ra guilecavi na lewe ni vanua.
lTaro:
Na veivakatorocaketaki cava era sa bau cakava ena noda vanua?
Era dui vakatorocaketaka ga na nodra vanua.
Veivosaki ni mateni:
Kai Kubuna na tamata vakaloloma – Tu na nodra qele ka sega ga na teitei – vakatagedegede ni vuli toro sobu – bisinisi e sega, gunuyaqona ga ka moce – Bula ni kerekere ka lala na taga – Me ra kua sara ni lamata cake – Vakabibi ko Kubuna – Me da cakava sara vakavinaka ni da sa raica na vei ka lelevu e sa caka oti, ka levu talega kina na veisau.
Kena i sau:
Ena gauna sa lamata kina na (Tuwawa/Kubuna) oya era na qalo kina ki wasawasa – nodra lolomma ko ni vaqeletaki kina – Tara na nomuni vale.
Ia, ke sa mani caka mai na veidigidigi (tikitaki Voreqe Bainimarama).
O Ro Teimumu ena noqu marama tikoga – Lima na yabaki e na loma ni Tebara, na vuli e sega ni bau cakava e dua na ka – Bainimarama e tara na neitou koronivuli ka sa yawa talega na veivakatorocaketaki e cakava na nona matanitu.
Ki vei kemuni na kai Tailevu, au kerea me rai tiko na matamuni, sa levu na i tukutuku me da vakacalai kina, kau kera mo ni kakua ni kauwai kina, baleta ni o Tailevu e sa on the Move – Push Tailevu. Ni kua ni malele ki na i tukutuku lasu.
Vinaka vakalevu.
TOMASI LEE
Nayavu, Wainibuka
Tailevu
Sa dau vakalewa na vosa na daliga
NIU vakawilika tiko na veika era cauraka na Dau Ni Politiki e Nai Lalakai, au sa qoroqoro ga e na levu ni veika era veikayayaka. Mai vei ratou na i lawalawa ni NFP, e ratou vakaraitaka na vu ni nodra lewena na i soqosoqo oya e vuqa na gone i Taukei vuli vinaka, ka ra cakacaka vinaka sara talega, baleta na Pati oya na NFP e a vakavurea e vuqa na vei tuvatuva vinaka ka da sa mai yacova tu e daidai me vaka na USP, FNPF, Housing Authority kei na vuqa tale e na veiliutaki vinaka nei Mr S.M.Koya kei Mr.Jai.Ram.Reddy. E ka dina taucoko oya, ka sega ni rawa ni da vakacala. E laki kau cake tiko mai na vu ni leqa ni vuaviri e mai yaco ena Tiseba ni 2006 ni ratou sega ni veitalanoa se duavata rawa na matanitu digitaki ni SDL kei na i to ni veisaqa na Fiji Labour Party. Kemuni na dau wilika Nai Lalakai, oya me dina kina na ka e kaya na i volatabu, ni rau na sega ni rawa ni lako vata e lewe rua kevaka e rau sega ni yalovata. Na duidui e sa tu qoka, ena keda maliwa, ena qai mai vakadodonutaki rawa ga ena nona sa na lesu vakarua mai na gone turaga o Jisu Karisito. E sa voleka sara ni lesu mai. Ena gauna madaga oqo, e sa na liutaka tale na noda matanitu o Bainimarama, ka sa vakadinadinataki e na i wiliwili levu era sa digitaki koya.
Na vu ni nona taleitaki ni a vukei keimami na lewe ni vanua keimami a sega ni dau kauwaitaki tu mai vei kemuni na vei Pati ka sa veiliutaki oti mai. O ni a dau veivukei ga vakataki kemuni ka kena i vosavosataki vaka Viti makawa na (Era veikilai ga vaka kau e cere) Na i tosotoso eda sa cavu i kalawa kina e na gauna oqo, mo ni nanuma vinaka tiko na noda dau veiliutaki, oya mo ni dau nanumi keimami na lewe ni vanua ka keimami tu ga e ra, ni keimami sega ni dau kauwaitaki mai vei kemuni na noda dauveiliutaki. Esa kena gauna donu oqo me da sa toso vata ki liu, me da veilomani ka cakacaka vata. Vei kemuni saka na dau wilika Nai Lalakai, vinaka vakalevu na noda dau veinanumi tiko. Meu na tinia na i tabetabe oqo ena rarama ni ka e kaya Nai Talatala o Pita ena (IPita 2:17) e kaya vakaoqo: Me da doka na tamata kecega, lomani ira na veiwekani, Rerevaka na Kalou ka vakarokorokotaka na Tui, oya na matanitu e veiliutaki.
Vinaka vakalevu
JOVILISI KEDRAYATE
Naimasimasi, Vugalei, Tailevu
