NA i solisoli ni dausoliwai oqo, e nodratou i solisoli mai na tubui keitou, ka veisolisoliki sobu tiko mai e na neitou mataqali, ka yacovi au sara mai e na gauna oqo.
E vakadeitaka mai na i tukutuku oqori ki na Na i Lalakai ko Manoa Nakato, e na nona vale mai na koro ko Burelevu, e na yasana ko Ra.
E kaya ko Nakato ni o ira na veiwatini ka ra sega tu ni vakaluveni, era dau gole yani ki vua na nona i tubutubu turaga, ka la’ki kerea kina na wai oqo.
Na gauna ga era la’ki gunuva kina, ka vakatabuya na kena tabu, e sa na kune sara na gone, ka vuqa na gauna era qai dau vakavinavinaka yani ni sa mana na wai era la’ki kauta mai. Tomana na turaga yabaki 57 oqo, ni yaco sara vei ira na kai Idia, e ra lakova yani na wai, ka ra la’ki veitalanoataka wavoki na kena mana.
“E tukuni tiko ni wai ni uwa, ia, na noqu raica tiko, e sega ni wai ni uwa walega, vuqa sara era sa sega ni rawati mai valenibula, ni ra mai gunuva ga na wai oqo, e takali sara ga na mate e kabiti ira tiko.
“Au tukuna tiko qo niu sa vakadinadinataka, baleta niu losea ka’u gunuva niu se bera ni solia yani e tuba,” kaya o Nakato.
Kuria na nona i talanoa ni vakila o koya na bulabula ni yagona e na gauna e gunuva kina, ka se rawa ni cakava na cakacaka kaukauwa era dau cakava na cauravou, dina ni sa toso tiko na nona yabaki ni bula. E kaya na turaga oqo, ni o ira na la’ki kere wai, era na dau kauta yani na yaqona, vakacabori mei kerei ni wai, na gauna sa ciqomi oti kina, sa qai la’ki kari mai na tolo ni kau, ka kau mai kina na wai.
Na gauna e sa vusoya tiko kina ko Nakato na wai, e sa na lose talega na yaqona ka sa kerei oti kina na wai. Oti oya e sa qai masulaki na wai, ka gunuva sara o koya e vinakata.
E kaya o Nakato ni gauna ga e sa gunu oti kina, sa na qai soli vua e dua se rua na bilo yaqona, ka sa na i otioti ni yaqona e gunuva me yacova sara ni sa oti e vula tolu.
“Na yaqona e gunuva o koya e vinakata na wai, e sa na i otioti, ka ni sa na nona yaqona talega ni tabu o ya.
“E lewe levu sara era vakatabuya vakavinaka na tabu ni ra via bula, ia, o ira na vakatara, era na dau mai tekivu vou tale yani,” kaya o Nakato.
Kivei kemuni ga na lewe ni vanua, ka ko ni via kila na kena vakatataro matailalai tale e so, ni qai vakamuria cake tu ga yani vakamalua na gaunisala totoka na Kings Highway, ka la’ki volo e na yasana i mawi ni ko sa siviti Waimecia, ka volai tu mai e na dua na matanivola lelevu na “Savulelele Waterfall”, o na sega vakadua ni na calata na koro ko Burelevu, ka ni sa na wawa toka mai kina ko Nakato.
