EDA na vakadinadinataka ni levu vei keda na lewenikoro eda sega sara ni kila vakamatata na yavu ni veiqaravi ni turaganikoro kei na bibi ni kena i sema ina matanitu kei na veivakatorocaketaki.
Ena gauna sa cava kina na nona veiqaravi e dua na turaganikoro, sa dau dabe tale na Bose Vakoro me digitaka e dua na turaganikoro vou.
E levu na gauna e sega ni dau matata tu vei keda na lewenibose vakoro na bibi ni noda digidigi ka sega tale ga ni matata vua na turaganikoro vou na yavu ni nona veiqaravi kei na bibi ni kena isema ina matanitu kei na veivakatorocaketaki ena koro.
Ena yavu ni bolebole levu qo, sa vakadeitaka na Tabacakacaka iTaukei kei na Matabose ni Veika Vakaitaukei me sa vakacurumi ena Lawanikoro Vakatututaki na itavi ni turaganikoro me vaka e virikotori ena Lawasau ni Veika Vakaitaukei (Bose ni Tikina kei na Bose ni Yasana) 1996 ka vakacurumi tale ga e so na kena ikuri me matata kina na itavi oqori.
Ena tikina 16 ni Lawanikoro Vakatututaki, e vakamacalataka na itavi ni turaganikoro me-
(i) tuvana vakamatau na Bose Vakoro ka vakamuria na kena lawa kei na kena iwalewale;
(ii) vakaivolataka na veika e veivosakitaki ena bose vakoro;
(iii)me cicivaka na kena cakacakataki na veika e mau ena bose vakoro;
(iv)vakarautaka na Ripote Vakayabaki ni koro me veitalanoataki ena Bose ni Tikina. Na ripote me yacova na i ka 31 ni Tiseba, na gauna yalataki ni ripote na i ka 15 ni Janueri, ni yabaki tarava,
(v) vakaivolataka na lewenibose;
(vi) maroroa vinaka na iyau ni koro sa tiko kina na veivakabauti ni bose vakoro.
Me ikuri ni itavi e vakamacalataki ena Lawasau 28 ni Veika Vakaitaukei (Bose ni Tikina kei na Bose ni Yasana) 1996, na turaganikoro e ivakalesilesi vakamatanitu ka dodonu me:
i)vakasokumana na itukutuku tau coko e gadreva na Matabose ni Veika VakaiTaukei
ii) vakasala matau ena gauna ni bose vakoro me baleta na veivakatorocaketaki;
iii) vukea na veiliutaki ena vuku ni cicivaki ni bose vakoro kei na kena vei komiti, e itavi ni turaganikoro me vakasavuya na itukutuku taucoko vua na turaganiyavusa ena vuku ni vakatutu e vure mai ena matabose qo;
iv) qarava na ivakalesilesi taucoko vakamatanitu/tamata yadua e vakauta yani na Roko Tui;
v) yadravi ira era curuma na koro kei na waqa era vakaruru ena iqoliqoli;
vi) raica mera vakaitavi taucoko na lewenikoro ena cakacaka vakoro me vaka e virikotori ena lawasau 25(4) ni Veika Vakaitaukei.
Ena ivakamacala qori, e vakabauta na Tabacakacaka iTaukei ni kevaka ena vakamuri vakavinaka ena veikoro sa na vukea vakalevu na cakacaka ni veivakatorocaketaki kei na nomuni tiko vinaka na lewenikoro.
Oni sa vakamasuti na turaganikoro, moni dabe dei tiko ena yavu ni veiqaravi oqori me vaka e virikotori ena lawa e vauca na nomuni veiqaravi.
Sa bibi me vakaituvatuva na nomuni ivakarau ni veiqaravi.
E sa mua na Tabacakacaka iTaukei kei na Matabose ni Veika Vakaitaukei ena dua na ivakarau vou ni veiqaravi, oya me vakilai vei ira na lewenivanua na weniligada kei na maqosa ni noda veiqaravi. Sa bibi tale ga me votu ena noda veiqaravi na tatadra ni Tabacakacaka iTaukei kei na Matabose ni Veika Vakaitaukei oya ‘Na Vanua Sautu, Na Viti Vinaka.’
E sa cakacakataka tiko qo na Tabacakacaka iTaukei na nomuni ivotavota vou na turaganikoro ka sa tiko tale ga na nomuni itavi ena kena cakacakataki na veika e sa vakacolati mai cake moni qarava.
Sa tekivu tuvatuvaka na Valenivolavola Liu e Suva me taleva yani na veitikina kei na veikoro, sa gauna vinaka tale ga qo mera na lai vakadinadinataka na veiliutaki na matau kei na maqosa ni nomuni ituvatuva na turaganikoro.
Sa veitataunaki na Tabacakacaka iTaukei kei na Matabose ni Veika Vakaitaukei meda duavata ka solevaka na bula ena koro me laurai votu na loloma dina vakavanua ka meda ivakadinadina bula ni nona rarama na Kalou vei ira eda bula veimaliwai ena veisiga.
