ERA sa sasaga tiko ena gauna oqo na tabana ni ovisa kei na mataivalu me ra vakavudera na kato ka lutu dromu koto ena boto ni sauloa volekata na koro o Silana, Dawasamu ena yasana o Tailevu.
Dina ni ratou tataro na ovisa me se kakua mada ni dua na i tukutuku me baleta na nunuvi ni wasawasa oqo e Dawasamu me kilai e Viti kei na veika e sasagataki me kilai se cava sara mada e tiko ena loma ni kisi oqo.
E vakaraitaka ko Meli Rabele, na turaganikoro e Silana ni a dau rogo i talanoataka tu maivei ira na nona qase ni a luvu voleka ena vanua e laurai tiko kina na kato e dua na waqa ena dua na gauna makawa sara.
?Na noqu a raica na kato oqo ena yabaki 2012, e a vesu tu na tutu ni kisi uma oqo e na sinucodo ena gauna au a nunu sasalu voli kina,? e kuria o Rabele.
Vakamacalataka na turaga yabaki 39 qo ni ratou a tovolea kei na tolu tale na nona i tokani daununu sasalu ena yabaki oya me ratou laveta se tosoya na kato, e sega sara ga ni rawa ni sa dua na ka na kena bi.
?Na lase madaga e sa tubu tale tu ena dela ni kato qo, ia, na delana e rauni me vaka sara ga na kato ni i yau ka ra dau kauta voli na dausoko ena gauna makawa,? e kaya o Rabele.
E kuria o koya ni mai oti na cagilaba o Winston ena yabaki sa oti, e ratou sa la?ki nunu tiko kina na ovisa ena vuku ni kena sa mai kilai na kisi oqo.
E vaka e kama na veigasau na i talanoa ni kisi oqo, e sa qai laurai e rua tale na kisi ka rau davo veitikivi tikoga mai na vanua e laurai tiko kina na kisi uma oya ena 2012.
?Na ka au qai mai rogoca na gauna qo, ni vaka me sa toso tu vakalailai mai na vanua e laurai taumada kina ni bera na cagilaba o Winston,? e kaya.
E tomana na nona i tukutuku o Rabele ni duidui tu na vanua era laurai kina na kato ka duidui talega na i bulibuli ni kato.
?Na kisi au a raica e kato levu toka ka vaka na levu ni kovate, ia, e rauni na delana, e so tale vei ira na daununu qo era raica talega na kisi e tautauvata taucoko na yasana ka vesu tu ena wa sitila me vaka na wa ni livaliva e dodo tu qo ena gaunisala,? e kaya.
E tukuna o Rabele ni rauta ni lima na kato e tiko ena loma ni wasawasa vaka-Dawasamu.
Ia, e dua talega na i tukutuku ni nodra parofisai na qase ka kunekunetaki e Nakorotubu ena 1920 e cavuti tale tikoga kina e dua na kato ka tukuni ni kato ni mana.
