Update: 9:35AM ERA vakila na tu mai na noda veiyanuyanu mai Lau na cava na sau levu ni bula, ena vuku ni veilakoyaki.
E kaya na i liuliu ni yavusa (vakatawa) mai Navuaruarua ena koro o Ketei, Totoya, o Tuimasi Colati Niumataiwalu ni via tarabi toka na i sau ni vodovodo ni waqa mai Totoya ki Suva, ia, e sau levu sara ni ko saumi waqa mai Totoya ki Moala.
Oqo e vakatinitaki na i sau ni vodovodo mai ki Suva, kevaka ko via gole ki Moala.
Ko na sauma ga e $105 na nomu i vodovodo ni waqa mai ki Suva, ia, kevaka ko na saumi boto (hire) me kauti iko ki Moala, ko na sauma e rauta ni $1,000.
Na i sau ni veilakoyaki ena waqa mai yanuyanu e sa sau levu sara ga. Keimami dau vakanuinui tu ga ena nodra dau yaco yani na waqa ni veiqaravi vei keimami na lewenivanua, me vaka na MV Sandy, ia, e dau lako ga yani vakadua ena loma ni dua na vula, e kaya o Niumataiwalu.
E vakadeitaka ni sega ni rawarawa na tu mai na veiyanuyanu, ni vakatauvatani kei ira na tu na veitaoni lelevu.
E dua na gauna e sa laki $15 na i sau ni dua na qaloni benisini, e kaya.
Vakaraitaka ni so ga vei ira na lewe ni koro era rawata mera volia na nodra waqa.
Na yanuyanu o Totoya e va na kena koro, ka wili kina o Tovu, Ketei, Dravuwalu kei Udu.
E vakadeitaka mai na i vakailesilesi ni Seaview Shipping, ni tau ya $105 na i sau ni vodovodo, oya mai Totoya ki Suva. Ena vula sa oti me yaco mai oqo, e rauta ni tolu na waqa e veisiko yani ki Totoya.
Vei keimami, e rawa ni gole ga yani vakadua ena loma ni dua na vula na waqa, ka sa kena i vakarau tu ga, e kaya o Niumataiwalu.
Ia, e vakaraitaka ena dua na nona soli tukutuku e liu, na Talai Veivuke ena Tokalau, o Kanala Netani Rika ni tomana tikoga na matanitu na veivakatorocaketaki ena tolu na yasana ena wasewase na Tokalau.
E kaya ni na segata na matanitu na nodra vukei ira na wekada mai yanuyanu, ka dua na gauna balavu na nodra dau tagica na wekada mai kea mera na vukei ena sala ni veilakoyaki.
