EDA sa yacova mai na i matai ni siga ni yabaki vou.
Au gadreva saka me?u kidavaki kemuni na dau wilika na Na i Lalakai ena veimacawa vakakina vei iratou na i vakalesilesi ?marama kei na turaga,? mai na vale ni volavola ni taba niusiveva, e na vuku ni noda veiwasei e na vei tukutuku ena noda vanua me da bulagoci e na veika e yaco vakararaba tiko.
Au na vakavinavinaka taumada vua na noda ?Kalou ko Jiova? na Dau ni Veibuli e na nona vakacaberi keda bula me da yacova na i matai ni siga ni yabaki vou oqo 2016.
?Isa? e sa yabaki vou, ka sa dodonu me vou na ka kece sara.
E tarogi keda na Kalou ka gusuna vei keda na Tui o Tevita ena Same:4-1 ?Au na vakavinavinaka vei Jiova e na gauna kecega; e na tiko tikoga e na gusuqu na vakamolimoli vua. (12) E qai vakagolea vei au kei iko na tarao oqo ka vaka: ?O cei na tamata sa vinakata na bula, ka sa via raica na veisiga vinaka? (13) Tarova na yamemu na ca, kei na tebe ni gusumu me kakua ni vosataka na ka lasu. (14) Lesu tani mai na ca, ka kitaka na ka vinaka.
Qara na veivinakati, ka muria sara. (15) Ni sa vakaraici ira na tamata yalododonu ko Jiova, ka sa qara tu na daligana ki na nodra masu. Au vakabauta ni oqo na ka e gadreva tu na lewe i Viti e daidai, vakauasivi na Kawa iTaukei, mai vei ira na noda Turaga kei na Marama Bale ni noda vanua.
Mai vei ira na veiliutaki e na noda Matanitu kei na Lotu.
E da na vaqaqa se cava e sa rui baya kina na noda bula na kawa iTaukei e daidai?
Sa o koya sara ga oqo na vuna ni da sa gole tani mai na ka dina, ka sa ka vakarairai walega na noda lotu.
Au kerea sara mo ni na vosota, ni kakua ni leva se yaloca e na kena tukuni vakadodonu na veika oqo, e na vuku ga ni nodra sa sega ni veiuvakasalataki vakadodonu na noda ih Talatala ni lotu va- Karisito.
Era sa galu ena veimadualaki vakatamata, e na nodra via vakalomavinakataki ira na i vavakoso, ka sega ni dokai koya na Kalou, o koya ka a veikacivi e na kena vakayacori vakadodonu na i tavi, e na vuku ni bula ?Tawa Mudu?
Sa koto donu kina na veivunauci e vakayacora o Jisu e na (Maciu 15: 8-9) O ira na tamata oqo era sa vakarokorokotaki au e na gusudra, ia, na yalodra e sa yawa tani vei au. A sa sega ni yaga na nodra masuti au, ni ra sa vakatavuvulitaka na vunau ni tamata mei vakavuvuli.
Vei kemuni saka na dau wilika na Na i Lalakai, e dina ga ni uto ni noqu i tabetabe ena i dola vou ni yabaki oqo na vakavinavinaka kei na veikidavaki raraba, ia, na veikidavaki kei na vakavinavinaka me na sala vata kei na veivakadreti me laveti kina na Kalou ni sai koya ga e da cabeta bula mai kina na yabaki 2016.
Au sa nuitaka ni o ni baci sega ni tauri au cala mo ni kaya niu sa tekivu e na vosa ni veibeci kei na vosa ni veidusi. me vaka era dau tauri au cala kina eso na wekada e na yabaki sa oti.
Ki vei kemuni saka na noda o ni sa vakarautaka lesu mai vei au na nomuni marautaka na noqu dau volavola ka vosa vakadodonu e na noda veva, vinaka vakalevu na nomuni dau veivakayaloqaqataki, ia, oqori na veivakauqeti ni ?Kalou? ena noda dui bula.
Sa dodonu me da tomana cake tikoga na vakaitavi e na veibulagoci e na veva.
E vuqa era sega ni via vakaotia na nodra gauna e na volavola e na veva vakaitaukei, ia, oqori na nona lewa e loma.
Era na via vakayagataka na nodra gauna ena Fiji Times ia, oqori na ka era taleitaka.
Vinaka vakalevu.
JOVILISI KEDRAYATE
Naimasimasi, Vugalei, Tailevu
