Update: 8:59AM SA veivakaroti na Matabose ni Dauvolivoli vua na Vodafone Fiji me dikeva tale mada na i walewale ni kena makete taki na nona veiqaravi. Oqo e na nona vakayagataki ira tiko na nona dauvolivoli me makete taka kina na nona veiqaravi ka sega ni rokova na nona bula galala na dauvolivoli.
E ciqoma na Matabose na kudru kei na vakatataro mai vei ira na dauvolivoli me baleta na sere e rorogo (hello tunes) e nagauna e qirita kina na dauvolivoli e dua na naba ni Vodafone.
Na sere e rorogo oqo e vakaisosomitaka na rorogo ni tirigi tirigi e na gauna e qiriti kina e dua na naba ni Vodafone. Na sere e digitaka na dauvolivoli e na rogoci tiko e na gauna e qiriti yani kina na nona naba. Ia, kevaka e dua na dauvolivoli e na gadreva na veiqaravi oqo e na sauma taumada e $1.98 ka na qai sausaumi tu ya $0.99 e na vei ya 30 na siga mai na i matai ni gauna e vakayagataka kina na veiqaravi oqo. E kauwai saraga vakalevu na Matabose e na i walewale ni kena curu boteilevutaki tu yani na nodratou i tukutuku ni veivoli na Vodafone me baleta na Hello Tunes e na rorogo ni taqiri ni talevoni e qiriti. E na gauna oqo e vakacuruma tiko na Vodafone e dua na i tukutuku ni veivoli lekaleka me baleta na sere e dau rorogo e na gauna e dau qiriti kina e dua na naba ni Vodafone ka vakaraitaka toka na i tukutuku ni veivoli oqoPress * to copy this Hello Tune. Ia, e na gauna e liu e sega ni dau vaka tu oqo. Ko ira na dauvolivoli e ra sauma mera vakayagataka na veiqaravi oqo, e ra namaka na sere e ra sauma me na rogoci tiko e na gauna e qiriti tiko yani kina na nona naba. E ra sauma na dauvolivoli oqo na sere e ra vinakata me rogoci mai vei ira na qiri tiko yani. E dodonu me na rorogo ga na sere e sauma na dauvolivoli me rogoci ka me kakua tale ni dua tani tale na rorogo vaka na i tukutuku ni veivoli nei Vodafone me na rogo.
Na kabani ni veiqaravi na Vodafone e sega ni dodonu na veika e vakayacora oqo baleta ni sega ni bau vakaraitaka se me taura mai vua na dauvolivoli ko e sauma na veiqaravi, na nona veivakadonui me baleta na kena rogoci na nodratou i tukutuku ni veivoli e na gauna e dodonu me rogo tiko kina na veiqaravi ko e sauma na dauvolivoli. Ia, kevaka e sega ni saumi na kena vakayagataki na veiqaravi oqo e sega ni dua na kena leqa kevaka vakacurumi tiko mai loma na nodratou i tukutuku ni veivoli. Ia a cava na vuna e ratou vakacuruma tiko mai kina na nodratou i tukutuku ni veivoli me baleta na nodratou veiqaravi dina ga ni sa sauma tiko na dauvolivoli na veiqaravi koya. E rawa vakacava me ratou vakacuruma na nodratou i tukutuku ni veivoli e na dua na veiqaravi e sa sauma oti tu na dauvolivoli me vakayagataka.
E sa veivakaroti tiko kina na Matabose ni Dauvolivoli vua na kabani veiqaravi na Vodafone me ratou kauta tani na i tukutuku ni veivoli oqo ka laiva me rorogo na sere e digitaka ka sauma na dauvolivoli me rogoci. E dodonu me kakua ni dua na i tukutuku ni veivoli me na rogoci tale tiko e na rorogo ni hello tunes sa sauma oti tiko na dauvolivoli.
E dua tale na tikina e rui kauwai kina na Matabose baleta na veiqaravi oqo ni hello tunes, sai koya na kena qiriti tiko yani na dauvolivoli mai vei iratou na kabani veiqaravi ni Vodafone e na naba 191 e na kena taurivaki na nodratou veiqaravi saumi ni hello tunes.
Na gauna e ra sauma kina na dauvolivoli na qiri oqo e sa tuvani sara tu mai vei ira na i tuvatuva ni veiqaravi ni hello tunes – ka qai usuraki mai vei ira na dauvolivoli me ra sauma ka vakayagataka na veiqaravi oqo. E sega ni bau via kauwai tu ko Vodafone me taura rawa na veivakadonui ni dauvolivoli ni bera ni qiriti ira.
Na Matabose e sa vakaroti Vodafone me tarova na vei qiri oqo vei ira na dauvolivoli baleta ni se bera ni vakadonuya na dauvolivoli. E na tikina oqo e rawa ni ratou biuta toka me dua na digidigi me ra toqa na dauvolivoli e na fomu ni kena rejisita taki e dua na naba kevaka me ra ciqoma se sega na vei qiri e so kei na vei tukutuku ni veivoli e so ko e na vakau mai vei Vodafone me baleta na hello tunes.
E vakarautaki toka e na nodratou fomu ni rejisita na Vodafone o ya na digidigi vei ira na dauvolivoli kevaka e ra via ciqoma se sega na i tukutuku ni veivoli eso kei na nona vakatulewataka me na rejisita kina MPaisa se sega. A cava na vuna e sega kina ni ratou rawa ni biuta na tikina oqo me i katolu ni digidigi, oya me ra toqa na dauvolivoli se digitaka me ra vakayagataka na veiqaravi ni hello tunes se sega?
Na i katolu ni kauwai ni Matabose me baleta na veiqaravi ni hello tunes sai koya oya ni ko Vodafone e sa biuta tu me tiki ni vei SIM kece na veiqaravi ni hello tunes. Na dauvolivoli taucoko ko e volia e dua na SIM e sana biu tu mai e na loma ni nona SIM na rorogo ni sere ni hello tunes ko e sa digitaka oti tu ko Vodafone me rogoci kina. E vakaraitaka na Matabose vei Vodafone na kena soli na digidigi vua na dauvolivoli e na kena taurivaki na veiqaravi ni hello tunes ka me kakua ni usuraki tu yani vaka koya vua na dauvolivoli na veiqaravi ni hello tunes e na gauna e ra volia kina na SIM.
E na kena cava na veivaqaqai mai vua na Matabose e na tikina oqo, e sa kauta tani kina na kabani veiqaravi na Vodafone na kena usuraki yani vua na dauvolivoli na veiqaravi oqo e na gauna e volia kina e dua na SIM. E dodonu talega me na kauta laivi e na kena gauna totolo taudua ko Vodafone na i tukutuku ni veivoli e biuta tiko me curu maliwa, tiko kei na rorogo e sauma na dauvolivoli, me rogoci, e na gauna e qiriti yani kina na nona talevoni.
