Esa vakadeitaka na Paraiminisita ni sa na tekivutaki na kena soli wale na wai ni gunu vei ira na vuvale e lailai na kedra i sau ena $30,000 lako sobu ka na tekivutaki ena Siga Tabu saraga oqo, 1 ni Veverueri.
Tukuna ni dua na vuvale ena soli wale tiko e 250 na lita na wai, oqo ga vei ira na lewenivanua e vakadrodroi tiko na medra wai ni gunu mai na Water Authority of Fiji.
E vakadeitaka na Paraiminisita ni oqo e dua na ka e saga sara tiko na matanitu ena kena kau tani na i colacola mai vei ira na vuvale e ra sotava tiko na dredre ni bula vakailavo.
Ena gauna oqo e sebera ni vakamatatataki mai se vica na i lavo ena sauma na matanitu ena vuku ni wai ni gunu e soli wale oqo.
E na vei ya vula tolu, e dau kau tiko mai na noda bili ni wai na lewenivanua e Viti, e ratou vakarautaka na kabani oqo na Water Authority.
E rauta ni $239 na milioni na levu kece ni ilavo e vakarautaka na matanitu ki na Water Authority of Fiji ena loma ni yabaki oqo me ratou qarava kina na nodratou i tavi.
E namaki me na vakarautaka na matanitu e 91,250 na lita na wai ena yabaki oqo ena vuku ni kena soli na wai ni gunu soli wale vei ira na noda era dravudravua.
E na macawa sa oti, a mai kere veivosoti talega na Paraiminisita, o Voreqe Bainimarama ena kena mai kamusu na paipo ka dau vakadrodroi kina na wai ca ni vale lailai mai Nabua ena vula o Tiseba.
E na gauna oqo e se waraki tiko na kena kau mai vavalagi na paipo me mai vakacobari tale ena kena sa kamusu oqo e Nabua, ka sa makawa sara na vu ni kena mai kamusu.
