Update: 11:05AM ESA qai mai vauca na nona daulomani ko Sekonaia Kalou na cauravou ka dau qito voli e liu ena timi ni rakavi lewe 15 kei na lewe ya vitu ni Viti ko Margaret Mary Steven e Navisabasaba, Nadroga ena mua ni macawa sa oti.
E rau mai vakamau na veiwatini vou qo ena matadra na veiwekani kei na veitokani ena loma ni valenilotu e Navisabasaba.
E tukuna o Kalou ni dau tokoni koya vakalevu na nona daulomani ena gauna ni qito ko Mary. O Kalou na cauravou ka dau kavetani e liu ni timi ni Nadroga esa qito tiko ena timi ni Waverley Harvesting Border mai Wanganui, e Niu Siladi.
E rau a sota o Kalou kei Mary mai Twickenham ena 2012 mai Lodoni ni oti na nodrau sota o Viti kei Igiladi.
Oya nai tekivu ni nodrau veikilai ka qai rau dau veitalevi tiko me tekivu mai na Janueri ni 2014.
Na nona i tubutubu turaga o Mary e vakaitikotiko mai Igiladi ia na marama tinana mai Motusa, Rotuma.
A sucu ga e Suva o Mary ka vuli e Lomary Primary School ena gauna e ratou tiko voli kina e Deuba, a mani la�ki vuli sara e Adi Cakobau o Mary. A mani gole ki Igiladi ni vakacavara vinaka na nona vuli e Adi Cakobau ka sa nasi tiko ena gauna qo.
E tukuna o Mary ni dau tokoni Kalou vakalevu ena gauna ni tuveiyawaki ka vakadeitaka na nodrau veiwekani tudei.
A mani vakaraitaka o Kalou vei Mary na nona sa gadreva me rau na vau ena i ka 25 ni Janueri ena nodra vakacagicagi voli e Viti.
A qito voli o Kalou ena timi ni North Otago ena 2005 kina 2006, ia ena timi ni Otago mai na 2007 kina 2010.
A tekivu qitotaki Viti ena rakavi tinikalima ena 2010 ena sota kei Ositerelia.
A qito talega ena sotasota ni Pacific Nations Cup ena 2010 ka digitaki talega ena sotasota ni qito ni vuravura ena 2011 mai Niu Siladi ka qito talega ena rakavi lewe ya vitu ni bera na nona laki qito e Varanise kei Itali.
Ena biubiu tiko ena i ka 8 ni Tiseba o Mary ka na siganisucu voli e Viti o Kalou ni bera na nona na lesu tale ki Niu Siladi.
E rau sa nakinaki tiko na veiwatini vou me rau na la�ki vakaitikotiko mai Igiladi.
