SA oti vakavinaka oqo e ono na yabaki na kena keli tiko na neitou qereqere e na neitou qele ni mataqali mai na bati ni uciwai na Rewa.
E vakaraitaka mai na i tukutuku oqori ki na Na i Lalakai, ko Sikeli Navuso na jeameni ni mataqali ko Lomanikoro, mai na koro ko Coloisuva e na yasana ko Naitasiri.
E kaya o Navuso ni tekivu na kena keli na qereqere e na veidinadinati e ratou veivosakitaka kei na kabani na Flame Tree, sa i koya na kabani me sausaumi vakadodonu ki na TLTB, o iratou na TLTB e ratou taura na nodratou 10 na pasede, na kena vo e ratou sa qai vakalutumu ki na nodratou i vola ni baqe na mataqali.
Kuria o Navuso ni tekivu na gauna e tawa kina na nodratou i vola ni maqe ni mataqali, ratou sa qai bose me ratou sa dui vakavinakataka mada ga na nodratou vale na lewe ni mataqali.
“So na vale keitou tara vou, e so keitou semata ga ka vakakina na kena vakavinakataki na vale ni neitou i liuliu ni yavusa.
“Me yacova mai na gauna oqo keitou sa tara oti e 16 na vale, tolu na kena rumu ni moce, valenisili, valelailai e loma, vanua ni savasasava, ka vaka varada wavoki.
“E tara na 16 na vale oqo e na i lavo ga keitou rawata e na kena keli tiko na neitou qereqere,” kaya o Navuso.
Kuria ni ratou sa raica ni sa toso vinaka na nodratou vale na lewe ni mataqali, ratou sa qai bosea me sa tara mada e dua na nodratou valenisoqo ni mataqali.
Tomana na turaga yabaki 64 oqo, ni veigauna kece eratou dau bose kina na mataqali, e dau veitokiyaki, caka na bose e na nona vale, tiko vei tacina, toi vei tavalena, ka sa dau vakasosa vei ira na gonevuli e na nodra dau vuli lesoni.
E kaya o Navuso ni ratou sa qai dabe vata na mataqali me ratou sa na tara ga e dua na nodratou valenisoqo, ka me ratou dau bose kina, ka me kakua ni vakaogaogataka na nodratou dui matavuvale.
E na siga Moniti gona na i ka 19 ni siga ni vula ga oqo, e sa vakavatukanataki kina na nodratou gagadre, e na kena sa vakayacori na vakasobuduru e na nodratou valenisoqo mai Coloisuva.
E kaya o Navuso ni i sau vakailavo ni nodratou valenisoqo e na ciciva toka yani na $200,000,00, ka sa nuitaka tiko o koya ni na vakacavari tiko e na yabaki mai oqo.
Kuria na nona i talanoa o Navuso, e na nona kaya ni sa na oti na tara ni nodratou valenisoqo, e ratou sa na qai tara tale e vica na vale lelevu me vakataka na nodratou dui vale, ka ratou na qai redetaka yani ki vei ira na vinakata.
E vakavinavinaka tikoga vakalevu vua na Kalou Levu sa tabogo o Navuso, e na kena soli tiko e so na mataqali vakasama momona ki vei iratou na lewe ni komiti, ka toso tiko kina na veika vinaka, me vaka e sa i vola tukutuku tu ni mataqali ko Lomanikoro, e na koro ko Coloisuva, e na gauna oqo.
