E KURUSETA tu na noda vanua lomani oqo ko Viti na kena voca na waqavuka na ‘Cessna 172’ e na Moniti na i ka 26 ni siga ni vula sa dromu.
Sa koto oqo e ra na serekali ka a vola mai o Qasenivuli Vakacegu Iliesa Baravilala, me baleta na kena voca na waqavuka e na delana o Delaikoro mai Labasa.
Ni tei wiliwili sara yani.
1. Ni rogoca saka mada noqu serekali,
Na yali ni waqavuka me?u serelaka yani,
Moniti rua ono ni Veverueri 2018 ni yabaki,
Na kena yali tawamacala e rui kurabuitaki.
2. Veimama ni vitu e na mataka sa biu tu ko Nadi,
Waqavuka ni vuli na ?Cessna 172? sa vuka tubu ki lagi,
Sai Iliesa Tawalo na kena kavetani,
Rau nona i tokani o Meresita Lutu kei Kalara Derederenalagi.
3. Ratou vuka baleta sobu na ?Bligh Water? me mua ki Labasa,
Roro ni waqavuka mai ?Waiqele? me talevi taumada,
E ratou veivakamocetaki ni sa mai sobu o Kalara,
Toso sara tale na vuka ki Savusavu me lai kele na waqa.
4. Mai dreve na i naki ni sa sega ni loloma na liga mai lagi,
Sai koya na vuna e vuni veisautaki tale kina na kabasi,
Mua lesu tale ki ?Waiqele? na Cessna 172 mai seva na i naki,
Na ?Delaikoro Mountain Range? me na takosova taumada yani.
5. Na taubi ni uca kei na vavaku ni kabu e tawa tukuni rawa,
E sakure na Cessna 172 e na drakica levu e loma ni macawa,
Mai Delaikoro e sa wawa tu ko mate ka da mai rarawataka,
Isa na bula lagilagi nei ?Iliesa Tawalo kei ?Merelesita Lutu? sa cava.
6. Oti e tolu vata na siga nodrau vaqarai voli,
Cabe vakavanua vua na ?Tui Macuata? sa kerei na nodra veitokoni,
Sa donu, ka mana, ka vura, na nodra la?ki sikovi,
Sa kune na i vocavoca ni waqavuka, isa e sa rui mosi.
7. Na koronivuli ni vuka mai Nadi era sa lolositaka,
Ena nodrau mai takali na nodra i tokani vinaka,
Isa au qai nanumi ira talega na wekadrau dina sara,
Meda masulaka vata ni na la?ki nodrau na vakacegu ni Kalou ko Tamada.
