SA koto oqo e ra e dua na serekali ka vakarautaka o Vairusi Seruvatu, yabaki 72, mai Buliya, Ono, Kadavu. E vakayatuyatutaka tiko e ke na veika vovou e mai raica e na koro vakavavalagi e na vuku ni veisau e kauta mai o gauna kei na i tautau vei ira na veiliutaki.
Ni tei wilika sara.
Ni vakarorogo na veiyasana
Noqu serekali meu tukuna mada
Me baleta tiko na noda Viti raraba
Na noda i tovo vakavanua sa yali sara
Au lako yani e lomai Suva
Na i sulusulu au sa druka
Noda goneyalewa ra sa taura
Au kure ulu ga au sa druka
Isa! ko Viti me da qarauna
Ko i keda na i taba e na gauna nikua
Me kakua ni rusa na noda vanua
Me bula ko Viti na kena kawabula
Kemuni na veiliutaki
Me keimami kua ni liumuritaki
Na vakaloloma e na qai neimami
Kei ira kece era qai muri yani
Noqu serekali meu sa tinia
Meu lesu tale ki na noqu vanua
Ciri koto mai na Sauca
Sa i Buliya dina na noqu vanua
