Update: 9:07AM SA koto oqo e ra e dua na serekali ka vakarautaka o Lote Rokovau e e na nona i tikotiko e Naividawa, Dratabu, Nadi e na vuku ni nodratou takali na nona i tokani.
Ena vakaraubuka ni macawa oqo, 18/4/2014, sa na yabaki 8 kina nodratou takali na nona i caba taumada vakacakacaka mai Iraki me vaka e vakayatuyatutaka tiko e na kena serekali qo ena 2006.
Ena veiyabaki au dau vakananumi ratou kina ena dua na kena masu lotu vakavuvale kei na dua kena tanoa yaqona ma balawa tu ga ni vakanananu ni veika sa yaco oti mai na dua na yasa ni vuravura ka laki veiqaravi tu kina, e kaya o Rokovau.
Ni tei wilika sara yani.
1. Au vakabula saka ki Viti raraba
Ki Kubuna, Burebasaga kei na bui ni masi e va na Tovata
Kerea meu vakarau serekalitaka
Nodratou takali na taciqu vakacakacaka
E Iraki se Papiloni ka kilai ena i volatabu makawa
2. Dua walu Evereli, saiva ono au nanuma rawa
Sa davo tu na i tuvatuva ni kalou levu ko tamada
Sobuta na koro ko kirikuki na o loaloa ni rarawa
Nodratou kacivi na va na taciqu mai na tolu na yasana
Keimami kurabui ka vakaisaisa na nodratou i caba
3. Yakavi ni Tusiti ni keirau yadra tiko kei na noqu i tokani
Sa veiciciyaki na katokau ni CRG sekuriti kabani
Vakadewataki na i tukutuku ni veivanavanai vakarerevaki
E Tikiriti sa mai kacivi e va na luvei Viti lomani
Vakawirimadigi mai vanua ocei sa donui koya na veikacivi mai lagi
4. Biu ko Kuweiti kei Basara na i tosotoso vakacakacaka
Ki Kirikuki ena vualiku mo dou vakadewataka na i usana
Na misini ni qiva waiwai e saulevu sara
E 30 na milioni na dola na kena i sau keitou taura rawa
5. Gaunisala balavu dou ciciva mai
Salavata kaya na nomudou vakadodorairai
Gaunisala vakarerevaki dou muria ka sega ni volai
Na meca sa viria oti tu na kemudou dai
6. Biu ko Tikiriti ka mua cake na i tosotoso
Ka ni kurabui sa rogo na cacabolobolo
Vanavana mai na meca ena veigasau ka vanua lolobo
Veivanavanai sa katuvu ka warai na voro
Ratou na cauravou ra yalovata veiraravui sa tasoro
7. Yacadratou na leqa meu cavu yacataka
Iosefo Cagi mai Vatulili, Nawaidina, Naitasiri neirau yasana
Kelemedi Dreuvakabalawa mai Nauluvatu, Nakelo, isa noqu ga vata
Anasa Navukaro mai Navuniivi, Navitilevu Ra noqu mata
Malakai Sekibureta mai Naimasimasi se Nacovu na kemui cavuti raraba
8. Nomudou mate meu vakamacalataka me matata
Dreuvakabalawa kei Cagi drau laugasau ena veivanavanai katakata
Navukaro kei Sekibureta drau sa mavoa vakalada toka
Kacabote na motoka ka drau kama vakaca sara
9. Rau na mavoa davo koto e valenibula
Veiyakavi rau dau sikovi ruarua
Sitiveni Qeleti mai Wainunu, Bua se Naulumatua
Taniela Toganara mai Vanuadina, Tokatoka ni wekaqu dina
Na i sema ki Vanuavatu, Naitasiri noqu yavutu e semati kedaru kina
10. Ratou na bula meu cavuqaqataka mada
Sakaraia Banicau na nodratou komada
E qase dina vei Kelemedi Dreuvakabalawa
Isa! taciqu lomani daru sa mai veitalatala
11. Isimeli Tiqara mai Keiyasi, Navosa ko ni turaga qaqa
Ben Waqairatu mai Suvavou, Rewa, isa noqu naita
Jone Damenaise mai Nagigi, Savusavu ko tagane dina sara
Ko liutaka na vanavana kei na veivueti ena buca ni vala
12. Josefa Morrel ko na tawaguilecavi rawa tamana
ki Nabukebuke vua na Tui Namosi drau veiwekani dina sara
Yalo ni koicolo ko vakaraitaka isa kawa
Vica na meca dou vakamatea ka so era dro bula rawa
Kanala ni Amerika e kaya ni dodonu me taqa na metali ni vala
13. Yakavi ni Vukelulu keimami lotu vata
Vakananumi vei ratou na sa mai kacikaci ni cagi toka. Keimami veicuvari ka drodro vakayauyau na wainimata
Isa! kemudou na taciqu me nomudou na vanua sa vakarautaka ko Jiova
14. Vei kemuni na wekadratou na noqui caba
Me sobuti kemuni na loloma levu nei tamada
Eda duavata ena o loaloa ni rarawa
Me da masulaka me nodratou na bula tawa cava
15. Au sa vakamoce tu ki Viti raraba
Digitaki meu serekalitaka na leqa e yaco ena vanua nei Evarama
Keimami mai cakacakataka ga na bula ni vuvale raraba
Bolea na mate me ra bula na kawa nimataka
16. Au sa suka ki Kirikuki noqu vanua ni cakacaka
Isa! Viti varataisi tawa guilecavi rawa
Lote Rokovau na yacaqu kei Vunivalu rara Waimaro Levulevu vei ira noqu turaga
Au vasu ki na yanuyanu ko Yaqeta tobu karakarawa ena Yatu Yasawa.
Ni sa tei moce saka mada
