E KAYA na i Liuliu ni To ni Veisaqa, o Ro Teimumu Kepa ni ratou sega ni via vakadinata na i tukutuku ni veivakacacani me baleta na i soqosoqo na SODELPA ka tabaki tiko ena tabana ni tukutuku ena macawa sa oti.
Vakaraitaka mai o Ro Teimumu ni i tukutuku e tabaki tiko oqo e sa vakavu veitalanoa tiko, ia, eratou sega ni kila se lako mai vei ka sega tu ni kilai o cei e vola na i tukutuku ka a vosa tiko kina o Mosese Bulitavu, na lewe ni Palimedi ena soqosoqo na SODELPA.
Ena macawa sa oti, e tabaki tiko kina na i tukutuku ni nona sega ni duavata ena vica na ka o Bulitavu, ena vuku ni veiliutaki kei na kena cicivaki na i soqosoqo e na valenivolavola ni SODELPA e Palimedi.
Oqo me vaka na nodra vakacakacakataki eso na i vakailesilesi ena nodratou valenivolavola.
E vakaraitaka o Ro Teimumu ni ratou na dabe vata tiko na matabose e cake ni SODELPA, ka sa na kacivi o ratou na raica na kisi vaka oqo.
Na komiti oqo ena qai dikeva na veika e sa ceuraki mai qo, ka ratou na qai tauca e dua na kena vakatulewa.
Tukuna o Ro Teimumu ni sa na waraki na macala ni nodratou bose vata na matabose e cake oqo, ka na qai macala kina na ka dina.
E vakadeitaka talega mai o Pio Tabaiwalu, na vunivola ni soqosoqo na SODELPA ni na vakadeitaki taumada na dina ni veidusi kei na veika e tukuni tiko, ni bera ni na qai caka e dua na vakatulewa.
Tukuna o Tabaiwalu ni sega ni rairai vinaka me mai veitalanoataki tu vaka oqo ena tabana ni tukutuku vakabibi e na i tukutuku vaka oqo.
?E vaka me sa mai veilewaitaki tu ena tabana ni tukutuku na veika e mai yaco oqo ena SODELPA.
?E sega ni vinaka vua e beitaki kei koya e veibeitaki tiko,? e kaya o Tabaiwalu.
Ia, e na Moniti mai qo, 24 ni Okosita, e na tekivu dabe tale kina na Palimedi.
