Solegi Nadarivatu toka na kabu ena mata cake ni Vakaraubuka sa oti na ika 14 ni Vevurueri. Tiko na gauna sa qai miri malua toka na uca. E siga namaki sara vei ira mai kea ena kena sa na lai dolava yani na marama Minisita ni Veikau Alitia Bainivalu na Nadarivatu Forest Park.
Dede na kena vakasamataki
Me vaka ga na kena ivakarau, ena nona yaco yani na marama minista, e a qaravi vakavanua. Ni oti kece oya, sa qai dua na vosa nei Bainivalu ni sebera ni lai dolava na Nadarivatu Forest Park.
E tukuna o koya ni sa dede toka mai na kena vakasamataki tu mai me dua na ituvatuva ni veivakatorocaketaki me vaka na Nadarivatu Forest Park. Tomana o koya na vakasama oqo ka kaya ni sa na rawa ni vakauqeta se vakavurea eso tale na sasaga ni bisinisi ena yasayasa vaka Nadarivatu.
Bisinisi me ravita
Qo e dua dina na ituvatuva, ke me raici sara vakayalomatua, ena sa na rawa ni vakavuna me tubu na veiqaravi vakabisinisi e Nadarivatu kei na veivanua volekata.
Ena vica na vosa ni tubetube e a rogo ena mataka ni Vakaraubuka sa oti, e tukuni toka kina ni sega ni vanua rawarawa meda yacova yani o Nadarivatu. Ni sa biu yani o Tavua, da muria na basoga ni sala me vaka ena koro o Korovou, eda na lako curuma yani na buca ka teivaki tu kina na dovu. E Balata, Malele me lai yaco yani ki Davota, e vakasulumi tu na qele ena sasaga ka se tekivutaka na matanitu koloni.
Ena koro o Waikubukubu, sa qai tekivu na cabe ka na volai toka vakavica na mata ni vola na S ni sebera ni yaco na ilakolako ki Nadarivatu. Kevaka e gole tiko yani vakayawa na ilakolako, sa na rawa ni tatara toka na wawale vei ira na lewe ni dua na ilawalawa. Qo e rawa ni dua na gaunisala me dua kina na ivurevure vakailavo ena nodra qaravi o ira era la’ki vakayagataki na gadigadi e Nadarivatu.
Ena rawa ni vakarautaki eso na kakana mamada tokaga ka dau yacana tu vakaperetania na refreshments. Sega ni kena inaki na mamau ia me vakabulabulataki tale na yago ni sebera ni cabeti na Nadarivatu Forest Park. Ena nodra lesu mai na taubale ena kena lai sikovi na tobu e a dau sili kina o Ratu Sukuna kei na so tale na vanua vakarautaki, sa na qai rawa ni vakarautaki na kakana — me sa ivakasigalevu beka — ka me sagai kina na mamau.
Ka era kilai kina
Ia na kena oqo, ena rawa ni vakayagataki saraga kina na kakana era kilai tani kina na tikina era wavokiti Nadarivatu; Savatu, Nadrau kei Nabobuco. Ena tolu na tikina oqo era tiko kina e vica na yavusa ka ra na rawa talega ni vakayagataka na igadigadi e Nadarivatu, ka dola ena Vakaraubuka sa oti, me dua na vatavata mera tukuni ira kina.
Sa dua na kena gaunisala na kakana. Levu vei keda era sa kauwaitaka sara tiko vakalevu na tiko bulabula. Era sa qarauni sara tiko na veika era kania ka ra saga me voleka sara kina were na veika era kania. Qo e dua na vanua era na rawa kina e rua na ka. Na tiko bulabula vei ira na gade yani kei na ilavo vei ira na itaukei ni vanua mai na loma ni colo oya.
Ia ena loma ni sasaga ni qara ilavo, me koto talega kina na vakanananu me maroroi kina na iyaubula; veikau, kena uciwai, manumanu kei na kena kawa tamata kei na nodra iyaubula me vaka na nodra ivalavala vakavanua kei na nodra vosa.
Vanua ni vuli
Ena nona a vosa toka o Bainivalu ena Vakaraubuka sa oti, e kaya ni na rawa ni dua na vanua ni vuli e yaco sara kina vakalevu na veitaratara. Na veitaratara e tukuna tiko o koya sa ikoya na nodra na rawa ni raica sara tu ga vakavoleka na veikabula e tu wavokiti ira o ira na lewe ni vuli. Era sega ni dabe tokaga yani e loma ni vale. Era sa tu sara tu ga ena kedra maliwa na veika era vulica tiko.
Qo e dua na tabana ni vuli era sa vakatututaka tiko eso. Era kaya ni na ganiti keda cake sara mai na kena e yaco tiko ena gauna oqo. E dua na lesoni era vulica na noda gone e yacana tiko na biology. E vulici kina na veika bula; kau, manumanu vuka, manumanu somidi lalai era bula e loma ni qele, na kena era qase e dela ni qele, na co, kau ena kena veimataqali, na ika kei na vuqa tale.
Kevaka e dua na kena vakasama me vakarautaki ka siviraki sara vakamatau, sa tu e Nadarivatu e dua na vanua me rau veisoli kina na vuli ena loma ni kena vale kei na vuli ena kedra maliwa na veikabula.
Na sasaga e kune kina na veimaroroi
E kaya talega o Bainivalu ni gadigadi e a dolava ena Vakaraubuka sa oti e koto saraga ena uto ni mataqali veivakatorocaketaki ka dewa na kena vinaka baleta na yaco kina na veimaroroi. Matai e maroroi kina na veikabula; veikau kei na manumanu kece era bula kina. Ni caka kina na ena rawa ni dewava e vica na itabatamata na kena vinaka.
Na veivakatorocaketaki vakaoqo e sega walega ni sa tutaki tiko e Viti. Esa roboti vuravura tiko na kena itukutuku ka sagai kina me maroroi na veikabula kei keda na tamata tabu saka yani. Se bibi tikoga na ilavo ia sa sega ni o koya duadua ya na uto ni sasaga.
