E dodonu me sa na veisau na noda vakasama na i taukei, ena kena gunuvi vakasivia na yaqona kei na qaravi na noda oga na i taukei ena gauna nikua.
Vakaraitaka mai na i Talatala ni Lewenivanua va- Karisito kei na Bula Raraba, o Talatala Iliesa Naivalu ni kevaka eda na sega ni yadrava na tikina oqo na i taukei, ena vakacicivi keda na oga esa veitaravi tu mai oqo.
E ka bibi na noda lewa vakavuku na noda bula.
Eso vei keda e sa sega na gauna ni nona vakacegu se moce, e sa qaravi oga mai ke, ka toki tale ena dua na oga e yasana ya, me laurai tu ga kina.
E dodonu talega me sa na kau laivi na bula ni noda veisisivi ni ocei e levu duadua na nona i yau kei na tabua ni caka e dua na oga.
Me da sa na qarava ga na oga e veirauti kei na i vakatawa ni taga, ka sa bibi ga na noda lewa vakamatau na veika kece e qaravi ena noda bula na veisiga, e kaya o Talatala Naivalu.
E tukuna ni kevaka eda na sega ni qarauna na qaravi oga, ena kauta mai na bula ni lomaocaoca.
E tukuna ni sa ka bibi talega na kena vakayagataki vakavinaka na noda gauna na i taukei, na noda vakavukutaka na noda qarava na noda i tavi kei na noda gauna ni qaravi na i tavi ena loma ni noda matavuvale ka me nanumi ni oqo e dua na i tavi me na qarauni vinaka.
