ESA veivakasalataki na i Talai Veivuke ena Wasewase e Loma, o Meleti Bainimarama na kena qarauni na veivakatoroicaketaki kei na veisau e sa lako curuma tiko o Viti ena gauna nikua, ka sa tarai kemuni talega na tiko ena noda veidelaniyavu.
Levu na veisau vovou e ra sa lamata tiko mai, vakabibi na kena vakayagataki vakawasoma na talevoni veikauyaki mai vei ira na luveda, na kena sa rawarawa na vakayagataki ni mona livaliva ( internet) vei keda na lewe ni vanua, na veisau ni noda i tovo vei ira na noda matavuvale, veisau na i vakarau ni veitalanoa ka vaka kina na veirokorokovi vei ira na noda qase, e kaya o Bainimarama.
E a laki dolava na bose ni yasana e Tailevu o Bainimarama ena Vukelulu sa oti ena Ratu Cakobau House, ka laurai ni ra osota yani na Mata ni Tikina kei ira na i vakailesilesi ni matanitu kei na so tale na veitabana ni cakacaka na bose oqo.
E vosa talega ena kena dau tau tiko eso na i vakasala yalomatua kei na veiliutaki maqosa mai vei ira na i liuliu ni kawa i Taukei ena gauna oqo.
Esa ka bibi na noda veitalanoa vakalevu, na mata ni tikina, na turaga ni koro kei ira na i vakailesilesi vakamatanitu ena kena soli tiko na i vaksala dodonu ena kena gauna dodonu, ena nodra vakacegui na lewe ni vanua kei na kena levei na veileqa eso e sala vata mai.
Me da kakua ni qai mai sota ga ena bose ka tarava, e kaya o Bainimarama.
