ESA koto oqo era na serekali ni gauna ka sala vata kei na talanoa ni sema sui mamaca ni mata ni veimatanitu ka talanoataka o Jovilisi Kedrayate mai Naimasimasi, Vugalei, Tailevu.
1. Ni vakarorogo na veiyavusa
E Viti raraba au via tukuna
Au sa kacivi meu mai vakasavuya
Vula ko Seviteba eda sa lokuca
2. Sega ni na veisau tale na gauna
Sa vakadeitaki oti tu mai Uluda
Sa lewai oti ena bose ni vanua
Veitalia ga se cava o nanuma
3. Na kena veivosaki au donumaka
Ena vale ni bose levu mai Nakauvadra
E vakasavu i tukutuku na qase o Waicala
Me matataki Viti ko Fereti mai wasa
4. Veitalatala ni sa biu na i tikotiko mai Uluda
Au muria sobu mai na Wainibuka
Vakasokomuni na qele dregadregata ni noda vanua
Sega niu kila se cava e vuna
5. Qele vaka Esia au sa butuka
Vale ni bose au sa curuma
Au vakanananu lesu ki noqu vanua
Ena noqu sa mai tu taudua
6. Ki vale ni bose meu yaco yani
Era sa tiko rawa mai na veimata digitaki
E dua walega sa waraki
O koya na mata mai Viti Ailadi
7. Niu yaco yani era tucake sara
Au kidavaki e na mata sarasara
E coba kece mai na yaloka ni mata
Niu vulagi gole yani vakayawa
8. Sa tekivu na veibuli ni sui mamaca
Sa na yaga eke na qele dregadregata
E vakayagataki vakalevu sara
Noqu nanuma ni sega na kena yaga
9. Na veibuli oqo e caka vakacava
Me vakamuria ga nai bulibuli ni tamata
Veimatanitu era sega ni rawata
Ni ra sega ni kila na ka era cakava
10. O ira na veimata era sa yavala
Sega ni dei na ka era bulicaka
Mata mai Amerika keimami mata sarasara
E mai tini koso ni sega ni vakacavara
11. Nai otioti ni veibuli sa donui Viti
O Manumanunivalu sa raikivi
E tekivu mai yavana laki cavaraka sara
Sa taqa rawa nai ubi ni bure delana
12. Era vakasausau ka mata sarasara
Sa mai cava na buli sui mamaca
Viti sa nomu na kalougata
O sa na kauta lesu na kato ni caka mana
13. Au mua lesu mai ki noda vanua
Meu vakasavui tukutuku lesu ki Uluda
Niu sa lesu mai ena bose kei vuravura
Me da sa na waraka na kena gauna
14. Vula ko Seviteba sa loku rawa tu
Era waraka kece na veimatanitu
Na macala ni veidigidigi sa kilai oti tu
Me vakamuai Viti ki na bula sautu
15. Ena levu ni kudru sa rogo mai
Veivakacacani kei na veivakalewai
Qarauni ira vinaka na dau veirawai
Vosa vakadodonu mo kua ni rawai
16. Na i tatau mai Uluda me nanumi vinaka
Vei koya e liutaki keda ni mataka
Veimata tamata kece me vukei raraba
Ni da kawa kecega nei Atama
17. Veimatanitu era tu na kena lawa
Da na kune vakacegu ke da muria vinaka
Nai vunau e tini sa koto rawa
Me da lomana na Kalou ka lomani ira na wekada
18. Nai otioti ni vakasala ni rogoca vinaka
Vakarautaki iko ena lesu mai ni Turaga
Kua ni vaqara nai vakatawa ni taga
Nai lavo kei Viti sa na kabuwacara
Veika kece esa na tawa yaga
