OQO na i kuri ni nona vakamacala o Talatala Iliesa Naivalu ena ulutaga mai na macawa sa oti ena kena bucini ena yavu va- Kalou e dua na veiwatini vou.
Ni wiliwili sara yani.
Na fika vaKalou ni vakawati- dua kei na dua sa dua
(God?s Equation for Marriage: When One Plus One equals One (1+1=1).
Dua na tagane ni soqoni vata kei na dua na yalewa, sa yaco na Duabau ni Vakawati.
Na tagane, e dua na tamata taucoko sa mai sema vata kei na yalewa ka dua talega na ibulibuli taucoko, sa kena isoqoni na Duabau ni Vakawati.
Na tagane kei na yalewa erau sa mai vakaduavatataki e na idrega ni veiyalayalati ni Kalou ena Lotu ni Vakamau e matana na i Talatala kei na i vavakoso lotu.
E va na sala Vakalou ni Vakawati
1. Mo Ciqomi kemu i sa (Vakatekivu 2:21-25
Ko Atama, e sega sara ga ni bau kila e dua na ka baleti Ivi. Na ka ga e kila o Atama ni okoya ?qo e lako mai vua na Kalou. Na vakadewa ni ?Living Bible? e kaya: ?This is it.?
Edua tale kena vakadewa: ?Ko a tu mai vei ena gauna kece ?qo?(?Where have you been all this time??)
E tavaladelade na uto i Atama ni raici Ivi e yasana. ?A cava ?qo?.. E dua qo e viavia tautauvata ga kei au??
Ena loma ni vica vata na siga ka vakatokayacataki ira tiko kina na milioni na manumanu o Atama, sa sosa e na kaukauwa ni nodrai valavala, kedra irairai rerevaki kei na vakadomobula ni matadra, batidra kei na rorogo ni nodra tagi se kodro.
Ia ni yadra mai na moce o Atama ka raica ni davo koto e yasana e dua e vakataki koya, malumu ka qai vakaciriloloma, sa lutu ga mai gusuna na vosa: ?Na sui mai n suiqu, na lewe mai na lewequ? (2:23a).
Sa vakadeitaka e lomana o Atama ni Kalou levu ga ka a buli koya, sa solia vua e dua e voleka ni vakataki koya me nona i vakataucoko, nona i vakalasa ka nona i vukevuke yaga.
Sa levu sara na i vakavakadewa vou ni vosa na ?yalewa? ena gauna oqo, ia vua na Dauniveibuli, sa dua ga nai balebale ni vosa na ?yalewa.?
E koto ena tikina e 23b: ?Sa na vakatokai me yalewa, ni sa kau tani maivua na tagane.?
E kautani maivua na tagane ka qai kau lesu tale vua na tagane ni tiki ni yagona ga.
Vei kemuni ko ni sa veivosaki se veimusumusuki tiko mo ni vakawati.
Sa ka bibi mo ni ciqomi ?kemuni i sa? ni sa Nona i votavota na Kalou vei kemuni.
Rai sivita nai rairai, lako sivita nona i tovo, ka raica na Kalou ena daku ni kemu i sa; qai ciqoma na Nona i votavota talei vei iko.
Mo ciqoma ni sa solia mai vei iko na Kalou na nomu i votavota.
Kerea vua na Kalou me solia na yaloka ni mata vakayalo.
Nai matai ni kalawa – ciqoma nomu ivotavota Vakalou.
Ni ko drau sa duavata mo drau okati kemudrau ni ko drau sa dui votavota ni Kalou vei kemudrau, drau sa na dabe ena dua na yavu dei mo drau ciqoma na malumalumu, na dredre kei na bolebole e tara mai nomudrau bula vakawati.
2. Biuti rau na nomu i tubutubu
(Vakatekivu 2:24. Na gone kece ena dau vakararavi vei rau nai tubutubu ena ka kece ga era gadreva.
Sa nodra i tavi nai tubutubu me ra cokonaki ira na gone ena vale, kakana, i sulu kei na ka kecega e gadreva na gone.
Na vakawati sa vaka na cakacaka ni Vuniwai ni mai tagutuva nai vicovico ni gone vei tinana. Na vakawati sa mai cava kina na bula vagone.
Sa mai yalani kina na bula vakararavi vei rau nai tubutubu.
Biuta – Tagutuva nomu i vicovico ni vakararavi.
Na veiwekani cecere duadua ni bera na vakawati sai koya vei Ta kei Na.
Ia ena siga kei na Lotu ni Vakamau – sa na veisau na i tutu oya.
Dina ni ko na rokovi rau tu ga na nomu i tubutubu, ia sa na mai yaco ko watimu me nomu ka talei, me ka bibi duadua ka me nomu i tokani voleka duadua.
E dodonu me matata sara tiko vua e dua na i tubutubu, ni gauna sa vakawati kina na luvena, me biuti koya, me sereki koya.
Solia vua na galala ka mo kakua tale ni qai lewai koya tiko.
Biuta – sa kena i balebale ni sa rawa vei rau na veiwatini me rau bula ga vakairau.
Sa i tavi ni tagane me vakadeitaka ni sa rawa ni qarava na watina kei na luvedrau.
Na vakawati e sega ni da mai dadavo wale tiko ga!
Me kana ka vakaisulu na yalewa kei na gone! Ke sega ni tagutivi nai vicovico mai vei Ta kei Na, ena sotavi e levu sara na dredre.
3. Mo kabita na watimu
Ena siga ni nomu vakamau ko drau sa mai vakaitavitaki kemudrau kina kei kemu i sa ena dua nai tavi bibi duadua me vakaitavi kina na tamata.
Drau sa mai vauci kemudrau enai vau ni vakawati.
Nai vau oqo sa veiyalayalati ni bula kei na mate, ni vauca na gauna taucoko ni bula ka me yacova sara ga na mate.
E sega wale ga ni nodrau veiyalayalati na tagane kei na yalewa, ia na tagane, na yalewa kei na Kalou.
Ena vakamau, drau sa mai veiyalayalati kina: Matai, mo drau veiwatini tiko e nomudrau bula taucoko, karua, mo drau veilomani ka veikauwaitaki vakataki kemudrau ka kena i katolu, mo drau dui maroroi kemudrau (Malakai 2:15,16; Maciu 19:3-6)
Na vosa ?kabita (cleave), e toka na kenai balebale e nai drega ni kau se pepa (glue).
Kevaka ko via wasea tani e dua vei rau na pepa, e rau sa na kadresu na pepa ruarua.
Sa i koya dina oqori na leqa e dau tarai rau na veiwatini ni yaco na veisere se veibiu, ka veitalia nodrau vakaraitaka ki vuravura ni sega ni dua na leqa ka daumaka kece tu.
Na ka dina ga e tiko, aya ni rau mavoa ka vuetaki ruarua ka qai tarai ira vakalevu cake na gone na kena revurevu.
4. Dinata ni ko drau sa yago e duabau.
Vakatekivu 2: 24
Na vosa ?one flesh? e kena wakatu na vosa: ?duabau? (oneness).
E kaya kina vakaoqo ko Louis H. Evans Jr. ni vosa ?one flesh? ena vakamau sa mai semati me duabau na yagodrau na veiwatini, na yalodrau, rau lomavata me rau wasea vata nodrau i yau, na rarawa, dredre kei na marau, rau duavata me rau curuma vata na buto loaloa ni veisiga sa bera.
Vei kemuni na cauravou kei na goneyalewa, mo ni maroroya na yagomuni mo drau qai wasea vata kei koya na cauravou se goneyalewa ka i votavota ni Kalou vei kemuni.
Oqo nai soqoni niVakatekivu 2:18-25:
E galili na tamata ni tiko duadua.
Sa vakila na Kalou na gagadre titobu ni tamata
Sa qai vakarautaka na Kalou na ka e gadreva na tamata
Sa ciqoma na tamata nona i votavota
Erau sa dui biuta na tamadrau kei na tinadrau
Erau sa veikabiti na lewe rua
Erau sa yaco me yago e dua bau
Erau sa vakaivotavota ena kamica kei na talei ni bula ni Duabau.
Ni bera na vakamau erau se lewe rua – Okoya kei Au, o iko kei Au.
Ia ni oti na vakamau, sa waicala na Iko kei na Au – sa yaco me ?o kedaru?.
Ni o drau sa duavata mo drau veiciqomi, mo drau kali kemudrau tani mai vei rau nomudrau i tubutubu, mo drau mai veikabiti me sa duabau – drau sa vakayacora sara tiko ga nai naki ni Kalou me baleta na vakawati.
Na yalewa a buli tani, oti sa qai kau vei tagane. Ko tagane e biuti tamana.
E rau dui biubiu ruarua, rau sa qai mai duavata e loma, ia e rau semati ki lagi vua na Kalou, ka semati vei rau na qase, na veiwekani kei na vuravura levu.
Na duabau ni vakawati
Dauvunau 4:9-10
Sa vakaraitaka na Vuku ni taucoko ni bula e yacovi ena tiko vakalewerua.
Na tagane e dua na ka taucoko, ka sa vakakina ko yalewa.
Erau sega ni veimama ni dua na ka.
Nai tuvatuva ni vuravura ni vakawati na 50/50, ia na i tuvatuva va-Kalou ni vakawati na 100/100.
Erau kauta vata mai nodrau duidui ka rau mai duavata vei Karisito, sa basika na Duabau Vakarisito.
Sa mai vakasiroi sobu nodrau dui ?Au? ka sa dudu ga ki lagi ko Karisito.
Na tagane kei na yalewa erau a buli me veiucui kei na Kalou (Vktkv 1:26a,27), aya e dua na ka erau tautauvata kina.
Ena qai tomani tale yani ena macawa mai oqo.
