Esa koto tale oqo e ra eso na noda vosavosa makawa ka ra sa biu ka sega ni vakayagataki tu ena gauna nikua, ena vuku ni veisau ni gauna kei na kena cabe talega mai na lotu ka lako vata mai kei ira na italatala ka ra vakayagataka vakalevu na vosa vaka-Toga me muria yani na vosa vaka-Viti.
Era cakava beka ena gauna oya ena nodra raica me rawarawa na kena vulici ka volai na vosa vaka-Viti ena vakadewa vaka-Toga mai na Fa ki na Va me vaka eda sa taurivaka tu e daidai e levu sara na vosa ka vaka-Viti ga ni vaka-Toga.
Ia, e tiko e levu sara na vosa makawa ka sa biu ena vuku beka ni dredre ni kena volai se cavuti ka a tabaki ena 1850 ko Danzel Hazlewood e dua na vavalagi, ni wiliwili sara mada yani.
- Becerui — na kena ibalebale ni sega ni tamata dina, e yalataka e dua na ka me cakava mani sega.
- Cogecoge — cudrucudru ni tarogi vei iko e dua na ka.
- Cokolosi — ni dua na veitagavi e vakayacori se cakacaka levu ena kena gadrevi me vesu e dua.
- Damule — ni dua na tamata esa manati koya e dua na via moce levu.
- Damuirara — ni sa dravuisiga vakadua na vanua ka dau tukuni vei ira na qase ni sa damuirara na vanua.
- Daligariva — ni dua e via rogoca kecega na ka e tukuni se veitalanoataki.
- Delasiga — na yasa ni saga ka qara ki liu se na dela ni saga ka qara yani ki na siga.
- Demo — na kena vakayacori na qoli ena bogi ka sega ni vakayagataki na cina.
- Drotini — na yaca dina e dau vakayagataki me kacivi kina na kuila.
- Drudrula — ni dua na ka me vaka na wai e gunu velavela se gunu ca.
- Drulua — ni dua na tamata tabu yani e sega na vuti ni yagona.
