Era marau nalewe ni Mataqali o Natusara ni ra mai ciqoma na ilavo levu e sivia e dua na milioni na dola me baleta na nodratou qele lisitaki kina na otela na Kokomo.
E tauyavu na lisi oqo ena nona veiqaravi voli mai o Radike Qereqeretabua ena veika me baleta saravanua se tourism.
Rauta toka na yabaki 1980, ena nona dau gole tiko ena koro, e raica ni levu na nodratou yanuyanu rairai vinaka, ia e levu tikoga na gone ni mataqali Natusara era gole tikoga mai e Suva ena kena sagai me mai vaqarai na cakacaka kei na vuli.
Sa qai nanuma o Qereqeretabu ke caka madaga e dua na bisinisi me rawa ni toboki ira mai na lewe ni vanua kei ira na lewe ni koro, mera vuli tikoga ena koro na gone, ka me raucakacaka tikoga ena koro o tina kei tama.
“O Dravuni kei Buliya na nodrau koronivuli na Natusara Primary School, ia na koronivuli oqo e tiko tale e Ono ka sa qai dau vakavuna ni gauna e kalasi dua na gone esa na kau me la’ki curu e bure,” e tukuna o Qereqeretabua.
Sa qai vakasamataka tiko o Qereqeretabu me dua na ituvatuva me baleti ira na gone mera vuli tikoga ena koro ka me rau cakacaka voleka tikoga o tama kei na tina.
“Sa qai tiko e dua na neitou yanuyanu o Yaukuve Levu ka vakasamataka ka au qai vakasamataka me tara mada kina e dua na otela.
“Esa qai tekivu cakacaka me laurai mai e dua na developer, ia ena gauna oya e levu vei ira na lewe ni mataqali era nanuma ga me caka ga e dua na backpacker.”
Ia, ena nona rai e dua esa matua na veiqaravi me baleta na saravanua, na backpacker e sega ni levu kina na tubu baleta ni sega ni mai vakayagataki kina e levu na ilavo.
Sa qai taketetaka o koya e dua na bisinisi e rawa ni vakavure ilavo sara vakalevu.
Rauta tiko na mua ni yabaki ni 2006, sa laurai mai e dua na kai Kenada vakabisinisi me mai lisi ena qele oqo,ka vakayacori sara na veika e dodonu me vakayacori.
Veimama tu na kena tara na otela, caka na vuaviri ka vakavuna na nodratou kere vakacegu na investor. Sa qai mai dua na leqa levu e sotava na Mataqali o Natusara.
E a nodratou vakasala na matanitu me kau na lisi kina Baqe ni Qele se Land Bank.
Yacova ni takosova yani o Walker e dua na milionea na yanuyanu Yaukuve ka raica ni sa tara tu vakavo na otela. Mai kea e sa tekivu kina na lisi vei ratou na Mataqali Natusara.
E vakaraitaka na vunivola tudei ni Minisitiri ni Qele kei na Yaubula, Paula Cirikiyasawa, ni oti e vitu na yabaki ena kena tekivu na lisi, me na qai tikici mai e 2.5 na pasede na ivakaiyaga ni tubu ni kabani (Kokomo) mena soli vei ratou na Mataqali Natusara — dua vakacaca na milioni.
Na lisi oqo sa veivuke sara vakalevu ena Mataqali o Natusara ena vuli, cakacaka kei na vei veivakatoroicaketaki.
