Update: 9:38AM E DUA na gonetagane yabaki 13 mai Kabara, ena Yatu Lau e sa vakayagataka vakavinaka na nona taledi ka vulica na cakacaka ni sivi tanoa mai vei tamana.
Ena veisiga Vakarauwai, e dau nona i tavi o Peni Dautu me na dau sivita tiko na tanoa me dau volitaki ena sitoa ni koro, me rawa ni veivuke ena loma ni vuvale, ena vuku ni bula ena veisiga.
E vakavulici koya ga o tamana, ka rau veiyacani, na cakacaka yaga oqo.
Na nona qarava toka na cakacaka oqo o Peni, e rawa ni taura e 3 na siga, ke osooso ena taura e va na siga.
E na gauna e gole kina ki na yanuyanu oqo, na tabana ni niusiveva oqo, e kurabui ni voleka ni o ira kece na cauravou me tekivu mai na yabaki 9 era sa tekivu vulica na cakacaka oqo.
E a sivita tiko o Peni e dua na tanoa e 20 na idi na kena levu.
E kaya ni sa yaga vakalevu na taledi oqo, baleta e dau levu na veitabana ni bisinisi lelevu e Suva, Nadi ka tiko talega na ota mai valagi e dau qarava na lewenikoro ena yanuyanui oqo o Kabara.
E dua na i talanoa taleitaki ni da wilika na veika era qarava ena nodra bula na veisiga na wekada era tu mai na yanuyanu.
E da kila deivaki ka dua talega na ka me da na marautaka tiko ni se vakabulabulataki tiko na taledi ni sivisivi kei na cakacaka ni liga era dau kilai tani kina na turaga ni Kabara.
E liu, era dau ta na waqa vaka- Viti, na tanoa, na lali kei na tanoa.
Ni da gole yani ena veisitoa lelevu era dau curuma na saravanua, me vakataki Tappoos, Prouds kei Jacks e sa tuvani tu vakamatau na tanoa, ka qai mai ceuti ka vanisitaki yani ena dua na kena i rairai e dreti ira na saravanua kei na vulagi era gade mai ki Viti.
Esa vakadinadinataka o Peni kei iratou na nona lewe ni vuvale na vinaka ni taledi oqo ka ra se vakayagataka tu na nodra qase me yacovi ira na i taba gone ena gauna oqo.
Kevaka me a vakaweleweletaki ena dua na i taba tamata e liu, eda sega ni kila se cava na veika era na sasagataka a wekada mai Kabara me nodra i vurevure ni i lavo.
E kaya talega o Peni ni so na gauna e dau levu na ota ni tanoa e dau soli mai vei iratou na tuakana me ratou na qarava, eratou sa dau mai veivuketaka vata vakaveitacini, ka dua talega na nona i okaoka ni ilavo o Peni baleta ni a veivuke ena kena qaravi na ota oya.
E laurai talega ena draki ni veiwekani oqo na bula ni solesolevaki.
Vei keda na tu ena veitaoni, e vaka me sa yali sara tiko yani na bula ni veiwekani vakaoqo.
Ia eda vakavinavinaka ni so vei ira na wekada mai na Yatu Lau, era se tomana tiko eso na i valavala ni bula eda dau kilai tani kina na kawa i taukei.
Na nodratou qarava na bisinisi ni ta tanoa se na kena siviti na tanoa, e sega walega ni da kaya ni sa rawa tiko kina na nodratou sede kei na bula vakailavo, e ratou vakabulabulataka tiko na taledi e a soli mai vei iratou na nodratou qase mai na vica na udolu na yabaki sa oti, ka se tomani tikoga me yacova mai na gauna nikua.
Na cakacaka ni liga vata talega oqo e na tautauvata kei na kena vakabulabulataki na cakacaka ni liga tale eso eda kilai tani kina na i taukei me vaka na tali ibe se tali kuta, na rubu vei ira na noda marama.
Na kena vakarautaki e dua na mataqali kakana eso na bula eda kilai tani ga kina o keda na i taukei e Viti kei ira na veimata tamata tale eso e Viti.
