NODA Railesu e na macawa oqo, e da na wilika kina na laba vakadomobula ena gauna e sa yavala mai kina na siviriti.
Ni tei wilika sara mada na i tukutuku ka a tabaki e na nomuni niusiveva oqo na i Taukei e na yabaki 1980:
E rau a lauta mate e rua na cauravou, e na dua na veivala, ka a yaco mai na koro ko Muanaicake, Vutia, Rewa, e na bogi ni Lotulevu sa oti, e na gauna era a gunu siviriti tiko kina.
Oi rau ka mate ko Eroni Motoviti (yabaki 26) kei Tevita Kaloulevu (yabaki 17), ka rau lewenikoro ruarua ko Muanaicake.
E rau lewe rua tale na cauravou ko Lepani Vuiyale mai Narocivo kei Peni Turaga, na taci Eroni, e rau a mavoa talega, ka rau cicivaki sara ki na valenibula Levu e Suva.
A suka tale ko Turaga ni dua walega na siga na nona qaravi mai valenibula.
Sa tiko vakavesu e na gauna oqo e dua na cauravou mai Lomanikoro, Rewa, ka sa na beitaki tiko e na mataveilewai e na laba vakadomobula oqo.
A nanumi me rairai ki na mataveilewai e na Vakarauwai sa oti, ia, ka sa bera tikoga ni lokuci e dua na tikinisiga me qai beitaki kina ni sa vakasokumuni na i tukutuku ni veika e a yaco e na bogi ni Lotulevu, ka ra vala kina mai Muanaicake.
Ia, na i tukutuku ka tauri e vaka koto oqo: A yaco e dua na veivala ka tini ki na veita mai Muanaicake, Vutia e na veimama ni 10 ki na 11 na kaloko e na bogi ni Lotulevu sa oti.
E ratou a gunu tiko e lewe 10 na cauravou e na dua na ruku ni vuni maqo voleka ga ki nakoro, ka tekivu sara mai kina e dua na veiba, ka qai tini sara ki na veivala.
E dua vei iratou na cauravou e a qai cici sara yani ki nakoro, la’ki dolava e dua na vale, taura mai na i sele kava, ka cici lesu tale ki na vanua era tiko mai kina na nona i tokani.
E ratou a gunuva tiko na cauravou lewe 10 oqo e tolu na tavaya siviriti, ka volia ga yani e dua vei iratou.
VEIBA
E dua ka gunu vata tale tikoga kei iratou ko Nikola Radrodro (yabaki 29), e kaya ni a lesu mai na siwa ka raici iratou na cauravou oqo ni ratou gunu tiko, ka mani lomana me sa tomani iratou yani, me rawa ni katakata na ketena e na nona vakabatabata toka mai wai.
Ni rauta na 10 na kaloko e a tubu cake e dua na veiba me baleta e dua na sere.
A via vakamalumutaka na veiba ko Suliasi Tawake (yabaki 24), ka sega ni mani rawa, ka tucake e dua vei iratou na cauravou ka vacuki Tawake, biuta sara na vanua ko ya, ka qai basika tale ni sa kauta tu yani e dua na i sele kava.
E na i tukutuku ka tauri mai vei ira na lewenikoro era a kaya ni lauta na domoi Eroni Motovili, ka qai mate sara kina ko Tevita Kaloulevu, ni a lauta na uluna ka mate talega.
Na yacai koya ka veita ko Jone Tabaiwalu, (yabaki 22) mai Lomanikoro, Rewa ka sa rairai e na macawa sa oti, ki na mataveilewai mai Nausori ka sa tiko vakavesu e na gauna oqo, ka me na qai macala tale e dua na tikinisiga me na basika tale kina ki na mataveilewai.
Ni sa tataki rau oti na lewe rua ko koya, e a qai cici lesu tale yani ki nakoro, curu ki na valenisoqo ka ra tiko kina e so na turaga, ka sa tekivu me veiwaroyaka yani na nona i sele vei ira ka tiko e vaka, ka mavoa sara kina e dua vei ira.
A qai tarovi rawa ga ko koya ni sa lutu mai ligana na i sele e na gauna e taceqe kina e na i kabakaba. E na gauna talega oqori era sa tekivu veitagicaki kina na marama, e na gauna era raica kina ni sa vana tu mai e na qavokavoka nei Tevita na dra e na loma ni vale.
Era a cicivaki Tevita e so ki valenibula mai Wainibokasi, ka qai kau tale vaka ki na Valenibula Levu mai Suva, ni bera ni qai la’ki cavuka kina na nona i cegu.
E kaya ko Nikola Radrodro ni a lesu tale ki nakoro me la’ki vakaraici Motovili, ia, ni sa sega ni raici koya rawa, e a gole lesu tale ki na vanua era gunu tiko kina vata kei na dua na cina benisini, ka raici Motovili sara ni sa davo tu vakatobuicu.
“Au tara na ligana se sa yavala tiko na nona i cegu se sega, ka’u qai kila ni sega tale ni dua na i cegu e se yavala tiko.
“Sa ciba sara tu ga e na gauna ko ya, ka sa robota wale tu ga na matana na nona dra mai na nona mavoa,” kaya o Radrodro.
Tomana ni gauna e laveta cake kina na uluna, e a qai kunea na mawe ni sele e na nona i tagitagi ka yacova sara yani na daligana i mawi, ka sa drodro vakayauyau tu ga mai kina na dra.
A lesu tale ki nakoro ka ra mai kauta na yagoi Motovili.
A qai la’ki tukuni vei ira na ovisa na laba vakadomobula oqo e na gauna e sa kau kina na yagoi Kaloulevu ki Wainibokasi. Era sa vaqaqa tikoga na ovisa e na gauna oqo na veika kece baleta na nodrau mate ko i rau na lewe rua kei iratou na a mavoa, e na laba ka kuruseta na noda Viti oqo.
