E SA na tara vou tale na makete mai Rakiraki ka rauta ni $5.84 na milioni na kena i sau.
Ena nona laki vakasobu duru na I liuliu ni matanitu, kaya o Voreqe Bainimarama ni solia e $2.64 na milioni na matanitu o Viti ka qai veivuketaka na vo ni sau ni makete na matanitu o Ositerelia kei na UN Women.
E kaya o Bainimarama ni oqo e dua na veivakatoroicaketaki levu ka veivuke kina na tabana ni Matabose kei Vuravura na UN Women e Viti. E na taura ga e dua vinaka na yabaki na balavu ni gauna me na tara kina na makete oqo, E kaya talega o Bainimarama ni o Rakiraki e dua vei ira na taoni e vakila na vakacaca ni cagilaba kaukauwa o Winston.
E na rauta ni 307 na turaga kei na marama era na rawa ni vakateveli ena makete oqo. E na tiko kina e dua na nona valenivolavola na manidia ni makete, ka vakarautaki na vanua ni vakacegu kei na sisili nodra na mai basa kei ira na lewenivanua. E na vakarautaki talega na nodra vanua ni moce na marama, kevaka era mai basa me vica na siga.
E kaya o Bainimarama ni veika e qaravi oqo ena vakabulabulataka na vakacicivaki bisinisi ena taoni o Rakiraki ka vakavure ilavo vei ira na veikoro kei na tikina era na vakayagataka na makete oqo ena veigauna kece.
