ERA dau vakataroga tiko se cava na vuna e sa dau lutu tiko kina eso na vale ena koro mai Vunuku mai Moala e Lau.
Esa qai saumi na nodra vakatataro na lewenikoro oqo, oya ni drodro tiko e dua na uciwai ena ruku ni qele ka dabe toka kina na koro oqo o Vunuku.
Esa qai kilai ni tiko na uciwai oqo ena lima ga na yabaki sa oti.
Ka sa basika mai ena dua na tutu ni koro oqo na ucu ni uciwai oqo.
Kena i vakadinadina ni sa laurai talega ena koro oqo na ika ni waidranu. Esa tekivu kania tiko na qele ka kovuta na koro na uciwai oqo, ka sa tiko ena i tuvatuva ni matanitu, oya me ra sa na tokitaki na lewenikoro ena loma ni vanua. Vakamacalataka mai na tikina oqo ki na Nai Lalakai na Roko Tui Lau o Joeli Nagera.
Ena vuku ni kena rivarivabitaki ni rawa ni yaco e dua na leqa vei ira na lewenivanua,
E dua talega na koro mai Lakeba, oya mai Waciwaci era sa na vakarau tokitaki talega.
Vakadeitaki talega ni rauta ni 135 na lewenivanua mai Waciwaci ena koro o Lakeba era sa na tokitaki ena dua na gauna lekaleka mai oqo. Vakaraitaka o Nagera ni sa dau luvu tiko na valenivuli kei na tikotiko ni koronivuli ena gauna ni ua levu.
Oqo na draki veisau e sa vakilai sara tiko ena veiyanuyanu mai Lau.
Esa vakaraitaki tiko vei ira na lewenikoro, io e vaka e so e dredre sara tiko vei ira me ra biuta na nodra koro.
Esa tiko na i tuvatuva me na tokitaki na koro o Waciwaci ena loma ni vanua, ka me yawa mai ena waitui.
Ka sa tiko talega na i lavo mai na Minisitiri ni Vanua Tani ena kena vakayacori na veiqaravi levu oqo, e rauta ni $1 na milioni.
Mai Waciwaci e rauta ni 45 na vale tudei.
