NODA Railesu e na macawa oqo, eda na wilika kina na kena la’ki vakayacori na lagalaga sere ni lotu ki valeniveivesu mai Naboro.
Ni tei wilika sara mada yani na i tukutuku ka a tabaki e na Na i Lalakai e na yabaki 1980:
E dua na i tavi ni veivakalotutaki era vakayacora na matasere ni valenilotu mai na Samabula East e Suva, e na nodra a la’ki lagasere vei ira na kai vesu mai Naboro e na yakavi ni Siga Tabu na i ka 20 ni Janueri sa dromu.
E vakavu na i lakolako oqo mai na nona kerekere e dua na kaivesu ka suka mai valeniveivesu, e na vula ko Tiseba ni yabaki sa dromu.
A mai kaya ko koya ni ka e gadrevi vakalevu mai valeniveivesu na nodra “Vakani e na kakana vakayalo” ka ni sa raica rawa ni lailai na gauna me rawa ni tuberi kina na i vakavuvuli vakalotu ka me na yaga vei ira na kaivesu ena gauna era suka mai kina.
Na kerekere oqo e a qai mani vakadonuya na Qase ni Valenilotu mai Samabula East, ka kerei ira na matasere ka kena i liuliu ko Alipate Vosawale, me ra la’ki lagasere vei ira na kaivesu e na dua na Siga Tabu, ka mani vakadonui.
E na yakavi gona ni Siga Tabu ko ya, era a lako kina, ka lako vata tale tikoga kei ira na i Liuliu ni Tabana ni Veivakalotutaki, ko Rev Sakeasi Salababa kei Sakenasa Rokotunidau kei ira e so tale na kena turaga, na lewe ni valenilotu e Samabula East.
E vakabauti ni a se sega ni bau vakayacori vakadua e na dua na gauna sa oti me la’ki lagasere ni lotu, e dua na matasere ni valenilotu ki na valeniveivesu, ka a mani rawa kina na lagasere e na Siga Tabu ko ya.
Era vodo yani na matasere e na dua na basi levu, ka dua na i lakolako vakatubu yalo luluvu dina vei ira ka ra la’ki raica e so na nodra veikilai se wekadra ka ra tiko mai valeniveivesu.
Na vakaciriloloma ni domo ni sere kei na qaqana, ka veilauti na kena i balebale, e a vakavuna na nodra yalo luluvu e so na cauravou, ka so sara era tavoya na wai ni matadra, e na nodra vakanananu ki na dui nodra matavuvale, vakabibi na kena vakauqeti vakayalo ka lako vata kei na vosa ni veituberi ni veivakalotutaki, ka tauca na i Talatala ko Rev Sakeasi Salababa. Sa i ira na i taba gone vakabibi ko ira na noda cauravou ka ra kauwaitaki tiko e daidai na nodra dau coko vakalevu e na basu lawa kei na vakacaca.
A rogo na kauwaitaki ni tikina bibi oqo e na nodra vosa na turaga na Paraiminisita, ko Ratu Sir Kamisese Mara e na bose ni i Soqosoqo ni Taukei e na vula ko Noveba, 1979, e Suva,ka vakakina mai Naluwai, Naitasiri, e na Vakaraubuka sa oti.
Na cava sara mada na kena i wali?
E kaya e dua na satini ni valeniveivesu e na macawa rua sa oti ni kevaka era tuberi ga vakalotu na noda cauravou, era na qai gole tani mai na ca.
“Ke dua tale na ka e caka, e na sega ga ni rawa me kena i wali,” a kaya o koya.
Tinia ni sa rauti ira vakavinaka ga na rogoca na sere ni lotu vakaciriloloma, kei na i vaqa vakayalo e veilauti, me rawa ni ra veisautaka kina na nodra bula vakayalo.Ni sa veisau se tarai na yalodra na kaivesu, e sa na qai sega kina na basu lawa kei na veitovo rerevaki, era dau vakaogai ira tu kina.
