ESA na rawa ni lewenivanua tiko mai Varanise o Alivereti Raka ena Vakarauwai mai oqo ka kena i balebale oya ni sa na rawa ni vakayagataki koya o Varanise me na lewena na timi ena sotasota ni Six Nations ena 2019.
A laurai na yacai Raka ena wiliwili ni yaca ka tabaki ena Journal Officiel na pepa ni matanitu ka dau taba kina na veika ni matanitu o Varanise.
Esa galala talega me na lewena na timi ni Les Bleus ka waraki tu mai vei Bernard Laporte na peresitedi ni unioni ni rakavi e Varanise.
Na nona rawa ni lewenivanua e kena i balebale ni a tiko voli e Varanise ena lima na yabaki, ka matanataka na vosa kei na volavola vaka-Varanise ka kila talega na veitukutuku makawa kei na i tovo ni vanua o Varanise.
Ena gauna a lewena kina na timi ni Clermont Academy ena Noveba ni 2014, a vakamautaka o Raka e dua na goneyalewa ni Varanise ka rau vakaluveni ka vakavuna na kena lutu mai na veika e gadrevi vei koya me dua ga na yabaki.
Ia, e dodonu me na pasitaka na nona vosa vaka-Varanise ena nona na vakatovolei me rawa kina ni lewenivanua ka me dua na nona i vola tara ni curu vanua ni Varanise.
A tabaka rawa o Raka e 29 na sikoa ena nona qitotaka vakatolusagavulu ka walu na timi ni Clermont, me tekivu mai na nona i matai ni qito ena Seviteba, 2015.
Ena sotasota se qai oti qo e tabaka rawa e 13 na sikoa mai na nona qito vakatinikadua ni bera ni qai mai mavoa ena Tiseba ni 2017.
