VAKADEITAKA o Kanala Jone Kalouniwai, na Chief of staff ni mataivalu ni noda vanua ni sega ni dodonu me da na ririko se rerevaka e dua na ka na lewenivanua ena gauna eda raica kina na tolili ka dau vakayagataki vakalevu ena buca ni valu ka yacana na Bushmaster.
E rauta ni 10 na Bushmaster e volia na matanitu me rawa ni ra vuli kina na noda ka vitu ena vakau ki Siria me na veivuke ena nodra cakacaka ni veitaqomaki na lewe ni mataivalu mai keya.
E kaya o Kanala Kalouniwai, ni kena laurai ena gaunisala e Viti na kena oqo baleta ni marautaki tiko na siga Vakaraubuka sa oti me Infantry Day se na siga e dau marautaki kina na mataivalu ni vanua.
E kuria ni lori oqo e dau usani kina na mataivalu ka ra taqomaki vinaka kina e loma.
Vakadeitaka ni sega ni dua na lawa e Viti e vakatabui kina na kena draivataki na lori oqo ena noda gaunisala.
E vosa tikoga oqo na mataivali ni oti na nona kauwai o Parofesa Biman Prasad ka kaya ni vaka me veivakarerei tiko na kena laurai ena tolo ni gaunisala e Suva na lori oqo ni mataivalu.
E kaya o Parofesa Biman ni levu sara era vakatataro era biuta tiko ena tukutuku veikauyaki se na social media.
E a vakaraitaka taumada e Palimedi na Minisita ni Vanua, o Ratu Inoke Kubuabola na kena voli mai na tolili oqo kei na kena vakayagataki mai vei ira na lewe ni mataivalu ni bera na nodra gole ki na buca ni valu ni tataqomaki ena Tokalau e loma.
Tukuna o Parofesa Biman ni matqali tolili vakaoqo e dodonu me na vakayagataki ga ena buca ni valu ka sega ni dodonu me na mai vakayagataki tiko ena noda veitolo ni sala e Viti.
E kuria o Parofesa Biman ni sa roro tiko mai na veidigidigi, e ratou sa na vakayacora tiko eso na i vukivuki vakaoqo na mataivalu.
Ia, e vakadeitaka o Kanala Kalouniwai, ni duidui na nona vakavakadewa o Parofesa Prasad ena veika e cakava oqo na mataivalu.
