SA i koya tale oqo na i kuri ni cau nei Nai Talatala Aisake Seru e na vuku ni lawa kei na loloma.
Ni tei wilika sara yani.
Nai tukutuku nei Paula e vaka e kauta mai e dua na draki ni vakatataro e na rai ni Vola Tabu vou me baleta na lawa.
E kaya ni vosa ni lawa e sa yaco kina na mate (Roma 7:10) ka dua talega ni lawa e vakavuna na cudruvi (Kal 3:13). E veiduavatataki ni mata ni vola ni lawa e na Veiyaayalati Makawa e veivakamatei , ia, na Yalo ni Veiyalayalati Vou e veisereki ka veivakabulai (2 Kor 3:6). E sa na dredre sara ni veivakaduavatataki na i tukutuku oqo nei Paula kei na nodrau rai ko Mosese kei na Dau ni Same ni rau dusia ni lawa e solisoli ni loloma vaka Kalou ka me i vakarau ni bula vei ir ana nona tamata.
Ni tovolei me dikevi vakamatau na vakasama nei Paula e tolu na ka e basika:
Na i matai: E dodonu me da vakadeitaka ni nona i naki taumada na Kalou me baleta na lawa e bibi cake mai na veivakasama e muri mai. Ni vakadeuci vakamalua na vakasama nei P:aula me baleta na lawa eda na raica ni sega sara ni duidui na nona rai kei na nanuma nei Mosese me baleta na lawa.
Na i karua: Ko Paula e dua vata kei Mosese e na nona vakadeitaka na bibi ni lawa, ka dusia ni kevaka e sega na lawa e na sega ni kilai na i valavalaca (Roma 7:7; Vakarua 4: 6-8), na lawa talega e savasava, dodonu ka vinaka (Roma 7: 12-14; 1 Timoci 1: 8; Same 119), ka kaya talega ni na matata ga na i Vola Tabu Vou kevaka e kilai vinaka nai ni lawa (Roma 13: 8-10; 2 Kor 6: 14-18; Lako Yabni 20: 1).
E rau duavata ko Jisu kei Paula ni rau dusia ni vakadavori vinaka ga na Yalo ni Lawa (Spirit of the Law) e na i Vola Tabu Makawa e na kauta tani na lomaocaoca ni noda tovolea me da vakaloloma vinakataka na Kalou kei ira na wekada, ia, eda na vakayacora na i lesilesi oqo e na lolkoma dina kei na yalo galala (Roma 13: 8-10; Kal 5:13).
Na i katolu: Ko Paula e vakamacalataka tiko vei ira na Jiu ni lawa e sega ni vauca na nodra vakabulai na kai Matanitu Tani (Gentiles). E sega ni kaya ni cala na lawa, ia, e dusia ni vakararamataka na lawa na nona bula e loma (Roma 7:7-25), ka sega talega ni taleitaka mera cilivi na kai Matanitu Tani me vaka e dusia na veiyalayalati.
E duai ko koya ni kevaka e dua e vakanamata ki na lawa me vakadulai koya, e na tini ki na mate. Na noda vakabulai e yavutaki e na noda vakabauta na loloma levu ni Kalou, oqo talega na i tukutuku e vakadeitaka na Torah.
E kaya talega ka vakadeitaka ni kevaka e sega na kaukauwa ni Yalo Tabu e sa na dredre sara me vakamuri na ka e vinakata na lawa.
E vakararamataka ko koya na ka e vakadewataka ko Mosese me baleta na cilivi ni Yaloda.
E na qai tomani tale yani.
