Update: 10:55AM
ESA mai kerea na nona vakacegu o Abdul Khan ka vunilewa tu ni tabana ni suka ena noda vanua.
E levu sara na kena veitalanoa kei na veika era tukuna mai na soqosoqo eso me baleta na nona sa mai solia na nona i vola ni vakacegu o Khan.
A kaya mai ena dua na i tukutuku tabaki o Parofesa Biman Prasad ni dodonu me na kau laivi vakatikitiki o Khan ka me na vaqaqai rawa mada ena vuku ni veika e sa yaco tu ena tabana ni suka ena noda vanua.
E a solia na nona i vola ni kere vakacegu o Khan ena gauna eratou a bose vata kina na matabose e cake ni Fiji Sugar Corporation, ena siga Vukelulu sa oti.
E levu sara na veivakadiloi me baleta na nona veiliutaki o Khan e ra cauraka tiko na National Farmers Union mai vua na kena i liuliu o Mahendra Chaudhry.
E kaya talega o Parofesa Biman, ni vua ni nona veiqaravi ena tabana oqo o Khan e sega soti ni vinaka, ka ni sa dua na vanua lolovira e sa tu kina na cicivaki ni tabana oqo, na i qaqi ni suka, kei na veika e tuvalaki tu e sa sega tu ni vakamatatataki.
E kaya talega o Parofesa Biman ni dodonu me na laurai vakavinaka na tabana oqo na FSC baleta ni vakayagataki kina na i lavo ni matanitu, na i vakacavacava era sauma tiko na lewenivanua, ka dodonu me na vakadodonutaki na tikina oqo.
Vakaraitaka talega o Parofesa Biman ni sa oti oqo e va na yabaki, mai na yabaki 2011 ki na 2014 ni laurai na kena rivote vakayabaki, e kunei ni sega soti sara ni tuvaki vinaka na i rairai ni FSC ni laurai vata na levu ni dinau e tu ena $225 na milioni.
