ESA yaco mai ki Viti e dua na koniteina ni veivuke mai vei ira na veiwekani vakalotu mai Korea.
Vakadeitaka mai na i tukutuku oqo o Talatala Ili Vunisuwai, na i vukevuke ni Vunivola Levu ni Lotu Wesele e Viti.
‘Esa kele tiko ena wavu levu e Suva na koniteina ni veivuke oqori ka na qai laurai na ka ni loloma cava e ra dodoliga mai kina.
‘Ena gauna oqo se ciqomi tikoga na rivote mai vei ira na i Talatala Qase ena vuku ni vakacaca e tara na valenilotu kei na i tikotiko ni lotu ena wasewase e 57 e Viti.
‘Se ra yaco tiko mai vakalalai, ka se bera ni ciqomi taucoko ka me qai biu vata na levu ni lavo ena gadrevi me na vakavinakataki na tikina oqo,’ e kaya o Talatala Vunisuwai.
E na vula sa oti, sa mai veiwaseyaki kina na i yaya ni veivuke me vaka na i sulu, na karasini, kuro kei na i yaya ni valenikuro tale eso, na i yaya ni moce me vaka na meteresi, tutuvi e mai wasei ki na tabacakacaka kei na yanuyanu e Viti era a sotava na vakacaca ni cagilaba o Winston.
Qo e sega ni wili kina na kakana dina, era kauta mai na veiyanuyanu.
Eratou kauta talega mai na Wasewase o Moala na nodratou i solisoli- ka wili talega kina na uvi.
Mai kumuni talega e $200,000 ena soli ni veivalenilotu ena i ka 6 ni siga ni vula o Maji.
Na i lavo oqo e sa vagolei kina noda vukei ka veivuke talega ena kena saumi na i vodovodo ni tolili kei na waqa ena kena veivotayaki na i yaya ni veivuke ki Wainibuka, Ra, Ba, Vanua Levu, Vanuabalavu, Koro, Lomaiviti kei Taveuni.
E vakavinavinakataka o Talatala Ili Vunisuwai na veivuke levu kei na yalo vinaka era tikica mai kina na nodra i yau, na kedra kei na medra na lewenilotu ena vuku ni veiqaravi yaga oqo.
Era sa veivakauqeti tale tikoga na i soqosoqo ni marama kei ira na radini talatala- oya me ra na veitokoni ka veimasulaki tiko vei ira na i talatala kei na nodra turaga ena gauna dredre eda lako curuma tiko oqo e Viti- vakauasivi vei ira na Tabacakacaka era vakaleqai.
