AISEA:23 Ni na lako yani mai Saioni nai vunau kei na vosa i Jiova mai Jeruisalemi.
?For out of Zion shall go forth the Law and the word of the Lord from Jeruishalem.
?Ki-Mitzion-tetzei tora Udivar-adonai-mirushalayim.
Ni sa bula vinaka tale mai na wekada mai na veiyasai Viti, sa tara na yadra.
E na siga Lotulevu na i ka ruasagavulu ni siga ni vula ko Jiulai, au a bau la?ki sisili talega kina ki Natadradave, Dawasamu, Tailevu.
E na neimami sa veitalanoa tiko e na dua na vale e na bogi oya, era sa qai vakatarogi au tiko baleta na noqu dau veibulagoci tiko e na Na i Lalakai, kei na ciwa na yabaki ni noqu tiko mai Isireli.
Era kerei au ke rawa ni bau dua na noqu i talanoa, ia, e na gauna vata sara ga oya e votu mai vei au na (Joni wase 5) o koya na tobu ni sisili mai Pecisaita.
Ia, oqo sara ga na vu ni noqu la?ki sikova na tobu ni sisili oqo mai Natadradave, baleta ni levu sara na vakasama duidui e da sa rogoca tiko baleta na wai oqo.
E vuqa sara vei keda e sa la?ki lako vakatani na nodra i talanoa se na nodra vakasama.
Kemuni na wekaqu mai na veiyasai Viti, vei au na wai e tiko mai Natadradave oqo e vaka sara tikoga e dua na tobu ni sisili.
E da la?ki gunu, ka sili talega kina, e vuqa vaka vuqa era sa la?ki sotavi sara ga kina, io, e vuqa talega e sega.
Au a qai talanoataka vei ira na tobu ni sisili mai Sabeto, Nadi ko Uciwai, era kila vakavinaka na tobu ni sisili oya, ni levu talega na lewe ni vanua era a vakabulai kina.
Au a qai talanoataka talega vei ira na tobu ni sisili mai Rokovuaka, Ra, ka vuqa vaka vuqa sara talega era sotavi kina.
Ko Uciwai mai Nadi kei uciwai mai Rokovuaka, e sa yali vakadua na mana e tiko vei rau e na gauna oqo.
Au via vakadeitaka tikoga vei keda ni oqo na i solisoli ni Kalou vei keda, oqo talega na i sau ni noda masu.
Oqo na veika e veivakarautaki tiko kina na Kalou vei keda e na dua na i musu ni gauna e da sa donumaka tiko oqo.
E levu sara na tauvimate e sa sega ni rawa mai valenibula, e levu sara era sa sega ni qai sotavi rawa mai valenibula, ia, era sa mai sotavi tiko e na tobu ni sisili mai Natadradave.
Kemuni na wekaqu mai na veiyasai Viti, o koya ga e vakabauta e na la?ki bula talega kina, kei koya e lomalomarua e sa na sega tu ga ni sotavi rawa.
Oqo e dua ga na gauna lekaleka e veivakarautaki kina na turaga ko Jisu Karisito se na Kalou Bula ko Jiova kei na Kalou ni Yalo Tabu.
Au a tarogi ira tiko mai Natadradave e na bogi ko ya, se sa vakaevei na tobu ni sisili mai Uciwai e Nadi kei koya ka tiko mai Rokovuaka, rau se tikoga se sa yali? Era qai sauma mai vei au ni sa yali ruarua, au a qai tarogi ira talega e na tobu ni sisili e na (Joni wase 5) na tobu ni sisili ko Pecisaita, e se tiko se sa yali? E ra qai galu baleta ni ra sega ni kila, au a qai sauma ka tukuna vei ira ni tobu ni sisili mai Pecisaita e sa yali talega na kena kaukauwa.
E se tu ga na tobu ni sisili (Peciseita), io, e sa mate tu, e sa maroroi tikoga me baleti ira na saravanua.
Au a qai tukuna ka vakadeitaka tiko vei ira mai Natadradave, kevaka e sa yali na mana ni veivakabulai mai na tobu ni sisili mai Uciwai kei na tobu ni sisili mai Rokovuaka, ka vakauasivi sara na tobu ni sisili mai na qele tabu e Jeruisalemi, tobu ni sisili ko Pecisaita, o koya e butuka ka cakacaka mana kina na Gone Turaga ko Jisu Karisito, ke sa yali kece na tobu ni sisili oqori, dou namaka tiko ni na dua na gauna e na yali kina na mana ni veivakabulai ni tobu ni sisili oqo e Natadradave.
Oqo e dua na veivakarautaki ni Kalou vei keda, Jiova Jaire, kena i balebale, na Kalou ni veivakarautaki; Jiova Nisi, na Kalou ni valu, Jiova Rofika; na Kalou ni veivakabulai.
Kemuni na wekaqu, o koya e sega walega ni dau valu e na loma ni nona veivakarautaki, o koya e dau veivakabulai sara ga. E na Joni wase lima, na i talanoa ni tobu ni sisili ko Peciseita, oqo sara ga na vakasama au vakadaberi keimami kina mai Natadradave e na bogi ko ya.
E na vei Siga Tabu kece ni vakacecegu, e dau mai veisiko na Gone Turaga ko Jisu Karisito e na tobu ni sisili oqo.
A se tiko kina e dua na tamata sa tauvimate tu ka yabaki tolusagavulu ka mani walu.
Ni sa raici koya ko Jisu ni sa davo koto, ka kila sa dede, sa kaya vua, ko sa via bula se segai?
Sa kaya vua ko koya sa tauvimate, sa sega saka, e dua na noqu tamata me kauti au ki na i silisili, ni sa vakayavalati na wai; ia, niu sa lako tiko kina, sa liu sobu vei au e dua tani.
Ena qai kuri tale yani
