E CAVUTI vei keitou na vosa ni veibeci ka keitou rukaki sara vakaca, ka tukuni talega me keitou vagalala mai na loma ni koro o Draiba e na Tikina o Nasinu e na yanuyanu ko Ovalau.
E vakadeitaka mai na i tukutuku oqori ko Maciu Sela Railumu e dua na turaga ka tukuna ni nodratou yavusa ga e ratou Vola Kawabula tiko e na koro ko Draiba.
E kaya o Railumu ni tolu na mataqali e na yavusa o Kaitotogo e sa kawaboko, ka sa qai vo ga na nodratou mataqali ko Vatuni.
Tomana ni ra a dro e na i se ni valu na nodratou qase ki Qamea, ka ra sa la?ki kacikaci ni cagi koto mai kina e na gauna oqo.
Ia, e na yabaki 2000 e sa suka tale mai kina vei iratou na nodratou qele e 295 na eka ka tiko ena daku ni tauni e Levuka, ka yaca ni qele oya ko Nosonoso.
Kuria o Railumu ni o ira kece era vakaitikotiko e Draiba e na gauna oqo, e sega sara ga ni bau dua vei ira e Vola Kawabula kina, ka sa kauwai sara vakalevu na nona mataqali ni ra sega ni vakatara na lewe ni koro me ratou tara vale kina.
E kaya na turaga yabaki 42 oqo ni kaukauwa sara na veivosaki e na Bose Vakoro, ka sa mani tukuna ga o koya ki vei iratou na lewe ni nona mataqali me ratou sa vakamalumutaka madaga ka me ratou sa la?ki tara ga na nodratou vale e na qele ko Nosonoso, ia, e ratou na saga sara vakaukauwa me ratou na lesu tale ki na nodratou dela ni yavu dina.
Ia, e vakamacalataka o Simione Sowane na turaganikoro ko Draiba ni ratou a tawana tiko e dua na vale e na koro ko Draiba na i lawalawa nei Railumu, ka ratou a mateni yani e na dua na siga Vakarauwai, ka ratou via la?ki tara vale sara e na dua na yavu ka lala tiko e loma ni koro.
Na vuna gona oya e kacivi kina na Bose Vakoro ka ratou tiko kina na Roko e Ovalau kei na i vukevuke ni Roko, ka vakamacalataki vakavinaka sara vei iratou na lewe ni nona mataqali (Vatuni) ni nodratou yavu e yacana o Totogo ka sega ni o Draiba, baleta ni koro ko Draiba e qele boro damudamu (Crown Land) ka nona na matanitu, e kaya.
Kuria o Sowane ni ratou a sega ni cemuri me vaka e vakaraitaka toka mai o Railumu, ia, e a tukuni ga vakavinaka vei iratou e na loma ni Bose Vakoro ni cala tiko na nodratou nanuma ka me ratou rokova na Tabacakacaka ni Qele Maroroi ka sa vakataulewa oti e na kena boro damudamu na koro ko Draiba. E sega ni rawa ni vakamacala o Saimoni Dobui na Roko Veivuke e Ovalau, Moturiki, ena tikina oqo, baleta ni sa vakau oti na nona ripote ki na nodratou valenivolavola ni veiliutaki e Suva.
