Ena noda vanua, ko ira na qasenivuli era sa qarava vakatabakidua na nodra tuberi na gone. Ia e dau sega soti ni rogovaki mai ena vatavata ni vakau tukutuku eso na nodra vakavinavinakataki ena veika era qarava. Ia, o ira era kila ni ra tamata qaqa ni veiqaravi baleta ni ra vakavotuya tiko e dua na veigauna vinaka mai muri vei ira na luveda.
E vakaraitaka o Vuniani Vasu na qasenivuli liu ena Ratu Finau Secondary School ni levu na qasenivuli era sega ni dau via lesi e koronivuli ena vei yanuyanu. E vu tiko oqo ni ra nanuma ni dredre beka na vanua e tiko kina, se sala ni veitaratara kei na veilakoyaki.
Oqo, e dua na tikina e vakamamasu tiko kina na qasenivuli liu e Ratu Finau Secondary School, na nodra vakamasuti na qasenivuli ena noda vanua me ra dau ciqoma na ilesilesi ena vei yanuyanu baleta oqo e tiki bibi ni nodra veiqaravi ena kena sagai me tarai cake na nodra rawaka vakavuli na gone ena vei yanuyanu.
“Na leqa levu talega e lako curumi sa ikoya na kena sega ni taucoko na gaunisala ni veitaratara se verisemati ena monalivaliva (connectivity), na veika e tu me qaravi kina na cakacaka e koronivuli (operation), na kena sega ni taucoko na vurevure ni livaliva (power source),” e vakaraitaka o Vasu.
“Oqo e vica na ka keimami gadreva vakalevu na qasenivuli me rawa ni vakataucokotaka na neimami veiqaravi, vakabibi na ituvaki ni vanua se na kena yawa na vanua keimami veiqaravi tiko yani kina. Au kila ni oqo na veika era gadreva tale tu ga na vei liuliu ni veikoronivuli eso me rawa ni tara na nodra veiqaravi vakauasivi na nodra tuberi na lalai, ka me vakauqeti ira talega na gone mera gole e vuli vakalewe levu.”
Oqo sa karua ni nona yabaki ni veiqaravi vaka liuliu ni qasenivuli e Ratu Finau Secondary School, ia e sega ni vou ena veiqaravi ena yanuyanu me vaka ni sa qasenivuli mai Adi Maopa Secondary School e Vanuabalavu, kei so na koronivuli e Labasa kei Taveuni.
