ESA vakaiotaka na Minisitiri ni Vuli na nodratou na laki vakaitavi na lewe lima na gonevuli mai na Ratu Kadavulevu me ratou na lewena na timi ni Viti vei ira na yabaki 18 e na sotasota ni Youth olympic mai Jaina.
E vakaraitaka ko Basundra Kumar na Vunivola Tudei ni Minisitiri ni vuli ni sa na veivuke sara vakalevu na sotasota qo ni Youth Olympic Games ka na veivuke ena nodratou na vakatoroicaketaki na dauqito ka rawa talega ni laurai yani ki na veivanua tale eso na taledi e tiko vei ratou.
E kaya o Kumar ni oqo e dua na madigi ni vakaitavi ka dau sega ni yaco wasoma ka solia kina na veivakadonui ni oqo na kaci ni matanitu ka sa soli kina na galala me ratou na laki vakaitavi.
Na timi ni yabaki 18 ni Viti qo e ra lewena na gonevuli mai na Sigatoka Methodist High School, Rampur College, Saint Johns College kei Ratu Kadavulevu School.
Ena tekivutaki tiko na qito qo ni Youth Olympic Games mai Jaina e na i ka 17 ki na i ka 20 ni vula qo. Esa kavetanitaka tiko na timi qo ko Ratu Epineri Uluiviti mai na Ratu Kadavulevu School, Alipate Qaraniqio, Eminoni Vuidravuwalu, Filipe Qoro, Josaia Cokaibusa, Navitalai Ralawa, Timoci Meya, Semi Tubacule, Waisea Daroko, Sailasa Powell kei Filimoni Nawabalavu.
