ERA a osota yani na koro ko Kumi e na Tikina o Verata e na siga Lotulevu na i ka 29 ni siga ni vula ko Tiseba e na yabaki sa oti, o ira na lewe ni koro kei ira na wekadra voleka e na kena dolavi na nodra bai ni ua ni koro.
Ni qai voleka toka na veimama ni 11 e na mataka ni siga o ya sa tadu yani na i lakolako ni matanitu, ka liutaka tiko yani na noda Paraiminisita o Voreqe Bainimarama, kei ira na i vakalesilesi ni matanitu e na soqo lagilagi o ya.
E a mimiri vakalailai na uca e na gauna e vakayacori tiko kina na veiqaraqaravi vakavanua e na valenisoqo ko Kumi, ni bera ni qai gole sobu na i lakolako vaka matanitu ki bati ni wai me la?ki vakayacori na dolavi ni bai ni ua.
Taumada na nona masulaka na i Talatala Qase ni Tikina o Verata o Talatala Inia Veidovi ni bera ni qai kotiva na reveni o Bainimarama me dolava kina vakamatanitu na bai ni ua e na koro ko Kumi.
Ni oti na nona dolava na noda Paraiminisita na gaunisala ki na bai ni ua, era sa qai sarasara na lewe ni koro, ka sa bau dua na bai ni ua rairai totoka dina.
E vakamacalataka na Gone Turaga na Tui Yasa o Ilaitia Ravasakula ni sa dua dina na i solisoli cecere e vakayacora na matanitu ki na nodratou yavusa.
Tomana o Ravasakula ni o ira na vale ka ra tiko mai bati ni wai e ra sa tokitaki cake e na ua gunu ka dau curuma tiko mai na nodratou loma ni koro, ka so na gauna e tara sara ga yani na mata ni nodra katuba.
?Na gauna oqo e rawa ni ra tara vale e na yasa ni bai ni ua, ka ni sa bau cere vinaka sara ga ka qai sega ni kauta mai vei keimami na loma taqaya, ? e kaya.
Kuria o Ravasakula ni nanumi ira sara na nona i caba e ra sa liu yani e na siga o ya, ka ra sega ni donumaka na i solisoli levu e vakayacora na matanitu ki na nodratou koro.
Ia, e vakavinavinaka tikoga vua na noda Kalou sa cecere sara e na kena vakavoci tiko mai na nodra bula me ra donumaka kina na siga lagilagi ka na i vola tukutuku tiko ki na nodra yavusa e na veisiga ni mataka.
Na gauna sa dolavi oti mai kina na bai ni ua, sa qai sureti talega o Bainimarama me la?ki dolava na nodra vale ni wai ni koro, ka vakakina na vale ni volavola i turaga ni koro.
Oti o ya sa qai sureti na noda Paraiminisita kei ira na nona i vakalesilesi vaka matanitu me ra gole yani e na dua na vakatunuloa ka sa vakarautaki toka e na rara ni koro, me la?ki vakayacori kina na gunu ti.
Na gauna sara ga era sa vakayagataka toka kina na ti kei na i coi ni ti totoka na vulagi dokai, sa qai ucu mai e na loma ni rara e dua na mata ni meke bula ka ratou a la?ki meketaka na turaga ni koro ko Kumi ki Niu Siladi e na yabaki 1979.
E kaya o Jona Koroiwaqa (turaga ni koro) ni yaca ni meke iri o ya na meke ni Dilio.
E ra qoroqoro ga na turaga Paraiminisita e na i vukivuki ni meke e ra vakaraitaka toka na turaga ni Kumi e na siga oya, ka sa rauta me ratou matataka kina na Tikina o Verata ki Niu Siladi.
So na gauna era dui qaraqara, ka so na gauna e ratou vakanoqonoqo vata e loma, ka taleitaki sara vakalevu ni ratou maroroya vinaka toka ga na turaga ni Kumi na nodratou meke, ka vakavulici sara talega vei ira nai sausau vou e ra tubu cake tiko mai e na gauna oqo.
Ni sa oti mai na meke, sa qai gole lesu tale nai lakolako vaka matanitu ki na vale ni soqo, me la?ki vakayacori na i vakasigalevu ka vakatitiweli dina na veimataqali kakana era tuvani koto e na loma ni ibe ni kana.
Na gauna e sa oti kina na vakasigalevu, sa qai mai vakayagataki yani na domo ni nodratou i vakatagi rogorogo vinaka na mataqiriqiri ni ovisa e na noda vanua.
E cerebu ga na loma ni vale e na veimataqali i vukivuki ni danisi totoka ka liutaka sara tikoga na noda Paraiminisita kei ira na marama ni koro ko Kumi.
E sega ni dua e via soro ka ni rau sota tu o ya na vanua veiwekani o Verata kei Bau, ka na i tukutuku ni veigauna tiko kina koro ko Kumi na soqo lagilagi e na siga o ya.
Na gauna e ra sa biubiu mai kina na vulagi dokai, sa qai mai vakayacori tu yani na gunu yaqona me yacova sara na naba lalai e na mataka ni siga ka tarava.
Sa vakanadaku na yabaki 2016, ka ra sa marau sara vakalevu na lewe ni yavusa o Yasa e na koro ko Kumi e na Tikina ko Verata, e na soqo lagilagi ka vakayacori e na nodratou dela ni yavu, ka ra na sega ni ririkotaka tale kina na draki veisau e tara tiko na noda vuravura, me vaka ni sa duri tu na nodratou bai ni ua, ka na taqomaka tiko na nodratou koro e na veiyabaki sa tu e matada.
