ENA vuku ni noda sa vakanamata tu oqo ki na dua na Viti vou, e vakaraitaka o Dilewa Ramasirai, e dua na marama ni Cakaudrove ni na gadrevi vakabibi kina na i tavi mai na vanua.
E qarava tiko o Ramasirai e dua na nona tabana ni veivakasalataki na Nest 7 Advisory (Fiji) Limited e na vuku ni kena gadrevi me da na kilai keda mada ga e liu kei na noda dui i tavi e na vanua ka vaka kina ki na matanitu.
Kaya o koya ni dodonu me noda i tavi taucoko na noda vakataucokotaka na i naki ni Kalou ki na noda bula.
?Na noqu i tavi me vakalesuya na veiwekani e na vanua ena vuku ni kei na maroroi na yago i Karisito e na noda bula,? e kaya o koya..
Kaya o koya na i tavi oqo sa i koya me rau na veivosovosoti taumada e liu na Matanitu kei na vei Turaga Bale kei Viti.
?Oqo na i matai ni kalawa ki na noda Viti vou kei na kena gadrevi mera vakatikori taucoko na veituraga bale ka mera vakamuria na yavu ni kawa i Taukei e na veisiga.
?Oqo na i vakarau ni i tuvatuva dina ka dodonu me veiqaravi kina na vanua,? e kaya.
Ni oti na veivakatikori ni dua na Turaga, e dodonu me qai vakayacora o koya na veivakatikori ki na i vei liuliu ni veiyavusa kei na mataqali.
Tomana ka kaya ni sa dodonu ki na Matanitu me na veisiko ki na Vanua me raica e na kena vakayacori na veisorosorovi vakavanua.
?Na Matanitu e oka kina o ira na vakailesilesi vakamatanitu, taukeni ni bisinisi kei ira na duikaikai e na noda vanua.
?Na veisorosorovi oqo e dodonu me dua na siga ka lokuci vakatabakidua.
?Sega na vuli, sega na cakacaka.?
E vakaraitaka o Ramasirai ni dodonu me da kua ni vakamuria nai tuvatuva e vakarautaka na matanitu vaka Bolatagane (Pyramid structure) baleta o keda na i taukei e tiko ga na noda i tuvatuva se yavutu.
?O keda eda sa Turaga e na noda i tutu vakavanua,? e kuria.
Era dau vakatoka e na gauna e liu ko ira na vuda ni Bose vaka Turaga me Bose ko Viti baleta nira matataka tiko na Vanua kei ira na noda Vu.
Tomana ka kaya na Bose ko Viti e kena i balebale nira bose na Turaga. E a qai vakatoka na Gone Turaga Talai sa bale ko Ratu Vanaaliali Sukuna na bose oqo me Bose Levu Vakaturaga.
Kaya o koya ni tiko eso na ka bibi e dodonu me vakadreti ka tara vakabibi na noda i vakarau ni bula na kawa i Taukei.
?Ko ira na Komai kei na nodra matanivanua e dodonu mera dau goleva na Bose ko Viti.?
Oqo ko ira na Komai e na veiyasana e Viti. Ko ira na Komai era dau veivakatikori vei ira na Turaga Bale, sega ni ko ira na Turaga ka ra sa vakatikori oti.
Na Bose ko Viti era oka vaka Kovana. Kuria ka kaya o Ramasirai ni dodonu mera dabeca tikoga na i tutu vakavanua na Turaga Bale kei na kena Sauturaga me rau yadrava tiko na vanua.
?E sega ni dodonu me rau biuta na vanua. Sega ni dodonu e na dua na gauna me vakalala na i tutu oqori.
?E rawa ni vakatauca na nona lewa na Turaga, ia, e dua ga na ka e sega ni rawa ni vakayacora sa i koya me kauta mai e dua me sosomitaki tiko vakawawa.
?E na gauna ga sa vakatikori kina e dodonu me taura matua tiko na vanua.
?Sa levu na ka e sa curumi uciwai tu e na noda bula vakavanua ena gauna oqo,? e kaya.
?Kuria ka kaya nira nanuma na Turaga ni gauna ga era sa vuli vinaka kina era rawa ni kauta mai na vakasama vovou ki na vanua.
Kaya o koya na vuku kei na vuli e dodonu me dau vakayagataki tiko e na loma ni Matanitu me vakavurea na bula vakailavo.
Na sala oqori e na qai rawa kina ki na Matanitu me vukea na vanua e na veivakatorocaketaki kei na veika tale eso.
?Dodonu me rau cakacaka vata na Vanua kei na Matanitu me vaka e dua na matavuvale.
?Ni gauna e rau sa na cakacaka kina me vaka e dua na matavuvale, eda sa tauyavutaka tiko e dua namatavuvale vaka Kalou ka da na duavata ena loloma , ia, ena loma ni veilomani oqori eda na kunea kina na tiko sautu,? e tinia.
