E VAKARAITAKA na i Liuliu ni Veitarogi Vanua o Ratu Vananalagi Vesikula ni sa na vakacavari tiko na kena vakacurumi ki na mona livaliva na yacada na kawa i Taukei e na noda i Vola ni Kawa Bula e na vula mai oqo.
Na nona vakamacala tiko o Vesikula e na dola ni Bose ni yasana o Bua ka a vakayacori tiko mai Nabouwalu e na macawa sa oti, e kaya kina ni a se dodonu me vakacurumi kece na yaca e na vula o Tiseba ni yabaki sa oti.
Me vaka ga ni oqo e se qai kena i matai ni gauna me vakayacori kina na veika oqo, e na taura toka e dua na gauna balavu me veitaudonui na veika kece ka me kakua ni dua na matanivola e cala e na mona livaliva ni bera ni qai tabaki.
Kuria o Vananalagi ni gauna e sa na oti kina na cakacaka levu oqo, e sa na bau dredre toka vua e dua na tamata, se dua na i lawalawa mera na via veisautaka e dua na ka e na i Vola ni Kawa Bula kei na veika e virikotori koto kina.
Tomana talega ni gauna e sa na cava kina na cakacaka oqo, e na vakarawarawataka sara vei ira na kawa i Taukei ka ra sa vakaitikotiko tudei mai vavalagi, mera digova na yacadra e na nodra tonoka ga na kena i vakasaribariba e na nodra mona livaliva, kevaka era via kila na nodra i Vola ni Kawa Bula.
Kaya talega o Vananalagi ni ratou na raica sara vakamatua na veitukutuku e na nodratou valenivolavola me kakua ni dua na ka me vakuri, se me boko laivi mai kina, ka sega ni yaco yani vei ratou na kena veivakadonui.
Kuria ni gauna talega oqo e sa cakacaka tiko na nodratou valenivolavola e na nodra vakacurumi na i Taukei e na Vola ni Kawa Bula.
Oqo e wili kina na nodra kauwai eso na na lewe ni mataqali e na nodra volai o ira na nodra vasu vei ira na tinadra e na lewe ni nodra Mataqali.
