E sega ni ka rawarawa dina na noda vakaitavitaki keda ena kena qaravi na vanua ena veigauna kece e vakacolati vei keda e dua nai tavi meda qarava ka ni tiko e levu na kena meca ka rawa saraga ni da viritaka se vovoleka ni viritaka na kena tawelu ni veiqaravi.
Oya na nona mala ni vosa ko Luke Koro na turaga ni koro mai Nalidi ena tikina makawa ko Bureivanua ena tikina cokovata ko Nakorotubu ena loma ni yasana o Ra.
“Au biu vuli ga mai Nasinu sa vakataqari vei au na itutu se na itavi vakaturaga ni koro,” e kaya ena vosa malua o Koro.
E tukuna na turaga vosavosa malua qo ni Navautaba ni dua na ka na nona marautaka na nona vakaitavitaki koya tu ena vuku ni nona vanua vakauasivi ni sa yabaki 20 qo na nona taura tu na itavi vakaturaga ni koro.
“E sega dina ni ka rawarawa ka ni so na gauna ena gadrevi me vakayacori eso na itavi ni vuvale vakauasivi ni ra tiko na gone me na tei na kedra ka me ra kana talega.”
Vei Koro eso na gauna esa dau vakila na oca ni qaravi itavi ia e dau vukei koya vakalevu na marama dauveiqaravi yalodina e tiko voli e yasana ena veigauna kece sai koya na marama na watina ka sa dau ivakaukauwa ni toso.
“Au kalougata ni bau dua na marama veiqaravi ena yalodina na watiqu ka dau vukei au vakalevu ena nodra qaravi na vulagi era basika mai ena neitou koro.”
Kuria na nona ivakamacala o koya ni levu sara na ka e vulica ena nona veiqaravi voli mai oya me dau vosota ka dinata na nona itavi ka me kakua ni dau rogoca eso na vosa ni veivakayalolailaitaki.
“So na siga keitou vakanuinui ena kequ isau ni dau mate na vula me rawa ni keitou bula kina, esa dau qai yaco bera tu mai ka sa dau icolacola bibi tu ni neirau vuvale.”
Na turaga yaloqaqa qo ni Nalidi e vurevure ni nona bula voli ena koro na yaqona, dalo, tavioka kei na kakana draudrau ka sa dau veivuke vakalevu vua ni dau bera mai na kena isau vakaturaga ni koro.
E vakatarogi se vakacava na dede ni gauna kevaka me dau bera mai na kena isau — e kaya ni rawa ni vakavula sara na kena bera tu mai na kena isau.
Tomana na nona ivakamacala o Koro ni eso na gauna ni dau veitaravi mai na nodra yaco mai na vulagi ena koro, esa dau tarabi na veiqaravi ia esa dau tu raviti koya na marama watina ka dau tokoni koya ena veiqaravi ka kuria tu na matadredredre me vaka esa la’ki vakadinadinataka talega na Na iLalakai ena nona veiqaravi voli mai kea e na loma ni va na siga.
Ni qai kida na mataka sa buta tu na coi ni ti mai vua na marama na watina, ko Miliakere Nai Koro na marama ni Uluivuda.
Eda qoroqoro ena vuku ni nona sega ni bera na nona veiqaravi ka sa noda ga na druka ena maqosa ni cakacaka ni kakana ka lako vata voli na noda dau matadredredre voli ga ka lako vata na vakalutuka toka na vosa.
Na loma ni siga va e veiqaravi voli kina mai Nalidi na Na iLalakai e vakadinadinataka na maucokona ni nodrau veiqaravi na turaga veiwatini ka sega ni vakamelei rawa. Sa rauta me qoroi na vunikau ka tubu toka e loma ni koro ka qai vakabai simedetaki toka vakamaqosa.
Sa dina sara na nodra ivosavosa na qase ni nona taucoko se toso vinaka e dua na turaga ena nona veiqaravi vinaka na nona marama.
Vei keitou na dauveiqaravi ni Na iLalakai keitou na sega ni guilecava na veivakataukeitaki kei na veivakamenemenei e a vakayacori vei keitou ena koro ko Nalidi mai vei turaga ni koro kei na nona vuvale ka vaka kina ko ira na lewe ni koro.
E tukuna o Koro ni sa dau bolei koya voli ga ena nona veiqaravi me vakayacora ena dela ni nona dina ka ni kila ni na saumi ga vei koya kei na nona vuvale na vinaka ni nona veiqaravi ena vuku ni nona vanua.
