Na siga ni sucu ni yabaki ruasagavulu ka dua e dau dua dina na solevu levu, eda dau vakarautaka na iTaukei ena nodra cabeta bula mai na luveda ulumatua. E dau duidui na kena qaravi na siga ni sucu yabaki rua sagavulukadua ena yasana e 14. Ena mua ira ni noda vanua, ra dau vakamenemenei na vuvale nei tinada ena soqo ni siga ni sucu.
Ena veika e sa yaco wavoliti keda tu nikua, bolebole ni bula vei ira na luveda ena veika sa tara tu na nodra bula, vakayagataki ni waigaga ni veivakamatenitaki, bukete dole, biu vuli se leqa cava e sotavi, ia ni marautaki na yabaki ni bula oqo e ivakananumi ni gone e yavutaki koya ena bula e taucoko ena veirokovi ka va-Kalou.
Vosa Vakaibalebale 22:6 e kaya na Kalou me da vakatavulica na gone e na sala e dodonu me na lako kina: baleta ni na qase mai, me na kakua ni lako tani maikina. Oqo na ivunau levu bibi e dodonu meda vakananumi kina na itubutubu se dauniveisusu ena nodra tuberi ka susugi na gone e vale.
Eda raica ka sarava votu ena noda Viti ena gauna nikua na nodra vakaleqai ka veilecayaki na luveda itaukei ena vei leqa eso me vaka na bukete dole se biu vuli ka tarova na nodra tatadra ni rawa-ka.
E bibi duadua na itavui ni tubutubu ena nodra tuberi ka susugi na luvedra. Sai koya na nodra veidusimaki dodonu na itubutubu ka na vakatorocaketaka na ivakarau ni bula ni gone.
Na veisusugi e dua na cakacaka se itavi ka dodonu me tomani tikoga. E sega ni dua na ka o rawa ni dro tani mai kina ni yaco mai na gauna baleta ni ra gadreva na gone na nodra itubutubu, ena veigauna eso, me ra tiko ga ena sala dodonu.
E rau veitauriliga na vakatorocaketaki ni veisusugi kei na vakatorocaketaki ni gone. Na vosa vakaibalebale ni sega ni lutu vakayawa mai na vunikau na apolo ka tubu na tabana ni sa tete talega na tabana lalai e rawa ni vakamacalataka vakavinaka na revurevu ni iwalewale ni veisusugi ni tubutubu kei na vakatorocaketaki ena nodra tuberi na gone.
Ena ika 13 ni Tiseba 2024, e vakadinadinataki ena vanua o Nadi na kena marautaki na yabaki ruasagavulukadua (21) nei Amalaini Lewabobo Leano Sovau.
Ko Amalaini Sovau e nodrau ulumatua ko Maikeli Turuva Sovau kei Adi Keva Dakolo Vianiburenitu Tiva. E cavu tu mai na koro o Saunaka, ena Mataqali Ketenatacini, Tokatoka Nasomulo, Yasana o Ba. Ka vasu ena mataqali turaga o Naua, na koro o Naboutini ena yavusa vakaturaga o Burenitu, yasana o Serua.
Na soqo ni siga ni sucu nei Amalaini Sovau e matalia na kena qaravi mai na kena eda sa dau vakananuma tu ga ena gauna oqo. Era vakarautaka na nodra I sulu ka veivakasulumi na vuvale nei Tinana. Era vakadarami Amalaini na isulu masi kuvui baleta ni ra vakamenemenei koya ni vasu i vale levu, Matqali Naua, Yavusa Burenitu e Serua. Era sa qai yabe vata cake kina nona dabedabe ka vakarautaka na tinana, ka veikau tiko na nona tutu levu, Ratu Keni Naimawi Tuinisautu. E sala muri Amalaini ko rau na tavalena loma ni vale ko Ratu Ilisoni Nabau Tiva kei Ratu Eparama Navale Tiva kei ira na marama wekai tinana kei nodra vakamamaca levu voleka tiko ni 100 na lobi ni sulu totoka. Ena nodra vakamenemenei Amalaini era sala muria tu mai ka lagasere tiko ni marau. E dau caka vaka kina me vaka ni vasu turaga ko Amalaini Sovau.
Ena kena vakarau ka itovo ena so na vanua ena yasayasa vaka-Ra, era a dodonu me ra dabe vata nodra momo, na ganei tinai Amalaini. Ia, baleta ni sega ni rawa ni tiko ena vuku ni osooso vaka cakacaka e Bolatagane, sa mani lokuci o rau na tavalena Ratu Ilisoni Nabau kei Ratu Eparama Navale me rau vakaisulu vakaviti ka dabe kei Amalaini.
Na nona idabedabe o Amalaini e rua na ivivivi vinaka ka kena isau vaka ilavo e volekata tiko na rua na udolu ($2000) e dua na ivivivi me vaka ni ra ibe vou taucoko, ka ota taki. E varautaki tale ga na nodra Taunamu ni Viti ka volai kina na yacadra ko Amalaini, ka vakaliligi e daku ni nodra dabedabe. E rau varautaka tale ga na itubutubu nei Amalaini e va na Kamunaga se Tabua, ka vakarautaki tale ga na nodra salusalu masi kuvui kei na iri ko Amalaini kei tavalena ruarua. Ena gauna ni veiqaraqaravi vakavanua eda na rogoca kina nodra vosa ni veivakamenemenei na Vuvale e cavu tu mai kina o Amalaini.
Sa mai cava na kedra cakacaka vakavanua ni siga ni sucu o Amalaini Sovau, sa qai mai dua tale nai tavi ni veiqaravi vakavanua sa ikoya na kena mai tevu nona dabedabe na Marama budra, Akeneta Komailevuka ena kena vakavinavinaka taki na nodra dau veivuke veisusu tu na gauna a sucu kina o makubudra Amalaini. E matai ni makubudra ena yasa vei Tinana kei Tamana o Amalaini. E rau vakarautaka e dua nai ivivivi kei dua na Kamunaga na itubutubu nei Amalaini me baleta na vakavinavinaka.
Na buna e cavu tu mai na Vuvale Naivisere ena koro o Tokou, Ovalau, Lomaiviti, ka nodra tutu vakavanua era qase i Vale Levu vua na vuvale Vunivalu e Bau. E diva o Amalaini me a bula tale tu ga na tukana ruarua, Tai Sovau kei Tutua Atu, vaka tale ga o nona Tai Emele Viseinavanua Uluivuda.
Na budra ko Amalaini, Tai Akeneta na makubudra na Turaga ni Yavusa e Naigani, Verata, Tailevu. Na Vuvale e vasu kina o Tamana, Tutu Pelasio Komailevuka. Ka vasu I Ucinivanua, Verata Tailevu na Tinadra ki na Vuvale Mataisau.
E dua na vakavinavinaka levu e na kena dau veimositi tiko na noda sema ni dra I na loma ni vale. Me vaka ni sema vakadra o Amalaini ki na vuvale turaga e Burenitu, Serua nodra vuvale na marama tinana. Ka ra vasu Turaga tale ga e loma ni vale e Vunisei o tamana, na vuvale Eluvuka ena mataqali turaga o Sabutoyatoya, dina ga e nodra tutu vavanua na qase e loma ni vale e na vanua vakaturaga o Ua e Saunaka.
Sa dua na itovo veivakaturaga taki sai koya nodra solevu taki na siga ni sucu ni luveda, ena nodra yacova bula mai na yabaki ruasagavulu ka dua. Ka sa kalougata dina ko ira era yacova bula mai ka kawaitaki mai vei ira na wekadra. Oqo e dua saka nai tovo vakamareqeti era dau vakavulici keda kina na tukada kei na buda, ka dodonu me da vakatovotovo taka tiko ena kena maroroi na noda itovo na iTaukei.
E dau solevutaki ga na nodra siga ni sucu na ulumatua. Ka dua na sasaga levu vei keda na sema veiwekani ena kena maroroi na noda itovo ni veivakarokorokotaki kei na veivakamenemenei, ka dau laurai kina noda loloma kei na yalo vinaka vakaveiwekani.
