Isa sobo ena dua na gauna, au butuka na koro qo ko Suva, au butuka me vula 12.
Bai simede levu boro vulavula.
Oya e dua na qaqa ni sere me baleta e dua na cauravou ena dua na gauna makawa sa oti ka vesuki ena bai vulavula ni valeniveivesu ka toka ena yasana imatau e Walu na nodra koro makawa na gonedau nei Tui Suva.
Eda kila vakavinaka ni o Suva e dua na isakisaki kei Viti ena tabagauna sa oti ena vuku ni a dabe toka ena dua na vanua vakatautauvata matau ka irova sobu tu yani na kena tobu rairai vinaka.
E dina ga ni vanua vucivuci ka suasua vakalevu ena levu ni uca e tau tiko kina ena veigauna kece sara ena loma ni yabaki, a qai mai veisautaki ni sa mai vakadeitaki me koroturaga ni noda vanua lomani.
Ko Suva talega era a cadra mai kina e vica na yaca rogo ena saqata kei Suva me vakataki Joe Black na tagane ni Naimasimasi ena yasana o Tailevu, Bug Jones, Sam, ka ra a kilai ena veiyasai Suva ena gata kaukauwa ni ligadra ena gauna ni qanitavaya ni bera ni ra qai la’ki veisau.
Oya eso na yaca vakavalagi era taurivaka tu na cauravou gone iTaukei kei Suva ena veigauna sa oti ni se bera ni levu na vanua ni lasa e Suva ka se vica wale sara me vaka na vale ni bameti nei Uraia kei na vuqa tale.
Au a bau nanuma e dua na qaqa ni sere e vaka koto oqo… Mai raica na loma ni koro, Ai divi veigauna taucoko, Turaki, Baniwai kei Naiqaqi, Na yaloqu e mate mate vei iko Suva.
Oya na qaqa ni sere ka ra dau sakitaka na tagane kei ira na veimataqali senikau talei kei Suva ena dua na gauna.
Ni sarava sara mada yani eso na itaba ni vanua kei na vale ena veigauna sa oti kei Suva ena gauna nikua.
Ena qai tomani tale yani.
