SA roro mai na mua ni macawa oqo na i ka 40 ni yabaki ni kena vakayacori tiko na sotasota namaki duadua ena qito ni lewe yavitu na Hong Kong Sevens.
Sa tiko vata talega na vakanuinui ni lewei Viti ki na sotasota oqo ka sa tiki tu ni noda nanamaki e na veitabayabaki e na i tuvatuva ni sotasota ni lewe yavitu ka sa dau vakayacori tiko.
Ratou sa biuta na noda matasawa e na bogi ni Moniti na lewe tinikarua na noda toa ni vala. Sa tu vata kei na vakanuinui ni na dua na i rogo ka lewe vuqa era vakabauta ni na rawa ni kauta mai o Viti na qaqa.
Sa lewe levu vei ira na noda dauqito era sa rawata na nodra bula ena buturara ni qito mai Hong Kong e na nodra sa laki lewena na veikalavo ni qito mai valagi.
Nida raica lesu na i tekivu ni sotasota oqo, sa dua na vakasama raiyawa e a bucini cake kina ka rabailevu sara mai na 12 ga na timi e ratou a tekivuna na sotasota oqo e na rara makawa na Hong Kong Football Club mai Happy Valley, Hong Kong ki na 28 na timi e na yabaki oqo..
Oqori na matatimi ni Indonisia, South Korea, Wallaroos (Ositerelia), Cantabrians (Niu Siladi), Toga, Japani, Sri Lanka, Malesia, Sigapoa, Thailand kei Viti – e dua na sotasota ka veitokoni kina na kabani ni tavako na Rothmans kei na Cathay Pacific.
A donumaka na gauna oqori e na kena se dau oso na yasa ni walesi e na vakarogo i tukutuku ni qito ena kena dau kaburaki sara ga ena gauna sara ga e dau vakayacori kina.
A vure cake na vakasama ni kena tauyavutaki na sotasota oqo ni Hong Kong Sevens oqo e na dela ni dua na tevelei ni vakasigalevu mai vei Ian Gow, e dua na vakailesilesi e cake ni kabani ni tavako na Rothmans Tobacco, ka vinakata me kacivaka na nona i voli na tavako – e na gauna ko ya e se dau vakayagataki na qito me volitaka na i voli ka sega ni veiganiti kaya e na vuku ni tiko bulabula vaka dauqito.
A wasea vei rau na A.D.C Tokkie Smith, jeameni ni Hong Kong Rugby Football Union ka kavetani e liu, na vakasama e na nodra sureti e so na timi vinaka duadua mera laki vakaitavi e na sotasota oqo. E na rawarawa cake na lewe yavitu mai na tinikalima e na veika vakailavo kei na veika e umani koto kina.
Mai na kena tekivu e na 1976 sa kadre ka vua na sotasota oqo me dua na qito namaki duadua e na i tuvatuva ni lewe yavitu e na noda vuravura.
E na kena tekivutaki e na yabaki oqori, dau kauwai sara vakalevu na lewei Viti ki na veitimi era dau laki valataka na yaca ni nodra e na buturara nbi qito mai Hong Kong.
A kalouca na noda matatimi ni a mai druka e na i matai ni sotasota ena 1976.
E a qai tekivu me curu mai na matatimi ni Igiladi e na 1990 vakacaca e na nona sa vakauta mai e dua na nona matatimi.
E na 1977, na i karua ni yabaki ni sotasota, a kuruseta na noda vanua e na nona a qaqa kina e na i matai ni gauna na matatimi ni Viti , ka sa tekivu e keri e dua na i sema ni veiwekani vakaqito vei rau na vanua e rua o Hong Kong kei Viti.
Mai na kena tekivutaki e na 1976 e a matai ni timi me taura na lagilagi na matatimi ni Cantabrians (Niu Siladi) 24 – Wallaroos (Ositerelia) 8; 1977 Viti 28 – Marlborough (Niu Siladi) 18; 1978 Viti 14 – Manawatu (Niu Siladi) 10; 1979 Ositerelia 39 – Ra kei Samoa 3; 1980 Viti 12 – Scottish Co-Optimists 8.
Ia, na i matai ni gauna a druka kina o Viti e na i matai ni gauna vei Ositerelia e na fainala ni 1983 e na 14 kei 4. A sotava na i matai ni nona qaqa vua na timi ni vanua o Niu Siladi e na 1984 e na 26 kei 0.
Sa koto na vakanuinui vinaka ni na dua na mua ni macawa vinaka vua na timi ni Viti oqo, ka vakak ina na nodra na rawata na i sau ni nodra bula mai na veikalavo era sa na wanonovi ira tu.
